డబ్బులు, అధికారం ఉంటే ఏదైనా దొరుకుతుంది!

• బెయిల్‌ తర్వాత నిందితుడి కామెంట్‌

• బెయిల్‌ రద్దు చేయాలంటూ

• బాధిత కుటుంబం పిటిషన్‌

• నిరాకరించిన సుప్రీం ధర్మాసనం

న్యూఢిల్లీ, సెప్టెంబరు 21: ‘డబ్బులు, అధికారం ఉంటే ఈ దేశంలో ఏదైనా దొరుకుతుంది’ అంటూ బెయిల్‌పై విడుదలైన నిందితుడు వ్యాఖ్యానించగా.. అతడి బెయిల్‌ రద్దు చేయాలంటూ బాధితకుటుంబం సుప్రీం కోర్టును ఆశ్రయించింది. దీనిపై సోమవారం విచారణ జరిపిన సుప్రీంకోర్టు త్రిసభ్య ధర్మాసనం.. బెయిల్‌ రద్దు చేయటానికి నిరాకరించింది. ఈ కేసు వివరాలు ఏమిటంటే.. హరియాణాలోని బెర్లాలో 2022 అక్టోబరు 28వ తేదీన ఓ భూతగాదా సందర్భంగా గజానంద్‌, విశాల్‌ గొడవపడ్డారు. ఆ క్రమంలో గజానంద్‌ మరణించాడు. తర్వాత పోలీసులు విశాల్‌ను అరెస్టు చేసి జైలుకు పంపించారు. బెయిల్‌ కోసం విశాల్‌ పలుమార్లు దరఖాస్తు చేసుకున్నప్పటికీ రాలేదు. ఈ ఏడాది ఏప్రిల్‌లో పంజాబ్‌ హరియాణా హైకోర్టు బెయిల్‌ మంజూరు చేసింది. ఈ సందర్భంగా విశాల్‌ వివాదాస్పద వ్యాఖ్యలు చేయటం, అది వైరల్‌ కావటంతో బాధిత కుటుంబం సుప్రీంకోర్టులో పిటిషన్‌ వేసి బెయిల్‌ రద్దు చేయాలని కోరింది. దీనిని ధర్మాసనం తిరస్కరించింది.