‘ఫ్లైదుబాయ్‌’ ఘటనపై ఎన్‌ఐఏ కేసు

• ఉపా చట్టం కింద నమోదు..ఉగ్ర కుట్రపై విచారణకు నిర్ణయం

న్యూఢిల్లీ, అక్టోబరు 10: ఫ్లైదుబాయ్‌ విమానంలోని కాక్‌పిట్‌లో కెప్టెన్‌ స్మిత్‌ మచ్ఛార్‌పై గత నెలలో జరిగిన దాడిపై ఉగ్రవాద నిరోధక సంస్థ(ఎన్‌ఐఏ) దృష్టి సారించింది. ఈ ఘటనకు ఉగ్రవాదులు కుట్రపన్ని ఉంటారన్న సందేహాలు తెరమీదికి రావడంతో ఆ కుట్రను వెలికి తీయాలని నిర్ణయించింది. ఈ క్రమంలో తాజాగా ‘ఉపా’ చట్టం కింద ఎన్‌ఐఏ కేసు నమోదు చేసినట్టు అధికారులు తెలిపారు. ఈ కేసులో ఫస్ట్‌ ఆఫీసర్‌(కో-పైలట్‌)ను నిందితుడిగా పేర్కొన్నారు. యాంటీ హైజాకింగ్‌ చట్టం-2016లోని సెక్షన్‌ 3, చట్ట విరుద్ధ కార్యకలాపాల నిరోధక చట్టం-1967లోని సెక్షన్‌ 15(1)(ఏ), అలాగే యూఏపీఏ(ఉపా చట్టం) సెక్షన్‌ 16 కింద కేసు నమోదు చేశారు. దీనిలో సెక్షన్‌ 15(1)(ఏ) ఉగ్రవాద కార్యకలాపాలకు సంబంధించింది. కేంద్ర హోం శాఖ ఆదేశాల మేరకు ఎన్‌ఐఏ కేసు నమోదు చేసినట్టు అధికారులు పేర్కొన్నారు.