కేజీ బేసిన్‌ గ్యాస్‌ వివాదంలో మధ్యవర్తిగా జస్టిస్‌ రంజనా దేశాయ్‌
ABN , Publish Date - Oct 31 , 2026 | 03:02 AM
కృష్ణా- గోదావరి(కేజీ) బేసిన్‌ గ్యాస్‌ తరలింపు వివాదంలో కేంద్ర ప్రభుత్వానికి, రిలయన్స్‌ ఇండస్ట్రీస్‌ లిమిటెడ్‌ (ఆర్‌ఐఎల్‌), మరో రెండు విదేశీ సంస్థలకు..
న్యూఢిల్లీ, అక్టోబరు 30: కృష్ణా- గోదావరి(కేజీ) బేసిన్‌ గ్యాస్‌ తరలింపు వివాదంలో కేంద్ర ప్రభుత్వానికి, రిలయన్స్‌ ఇండస్ట్రీస్‌ లిమిటెడ్‌ (ఆర్‌ఐఎల్‌), మరో రెండు విదేశీ సంస్థలకు మధ్య తలెత్తిన వివాదంపై సుప్రీంకోర్టు కీలక నిర్ణయం తీసుకుంది. సుదీర్ఘ కాలంగా సాగుతున్న ఈ వివాదాన్ని పరిష్కరించడానికి మాజీ న్యాయమూర్తి జస్టిస్‌ రంజనా ప్రకాశ్‌ దేశాయ్‌ను ఏకైక మధ్యవర్తిగా నియమించింది. ప్రధాన న్యాయమూర్తి జస్టిస్‌ సూర్యకాంత్‌, న్యాయమూర్తులు జస్టిస్‌ జోయ్‌మాల్య బాగ్చీ, జస్టిస్‌ విపుల్‌ ఎం. పంచోలీతో కూడిన ధర్మాసనం శుక్రవారం ఈ మేరకు ఉత్తర్వులు జారీ చేసింది. ఈ వివాదంలోని సాంకేతిక సంక్లిష్టతను దృష్టిలో పెట్టుకొని ఇరు పక్షాలు సూచించే ఇద్దరు సబ్జెక్టు నిపుణుల సహాయాన్ని మధ్యవర్తి తీసుకోవచ్చని పేర్కొంది. మధ్యవర్తికి పూర్తి సహకారం అందిస్తామని కేంద్ర ప్రభుత్వం తరఫున హాజరైన అటార్నీ జనరల్‌ ఆర్‌. వెంకటరమణి హామీ ఇచ్చారు.