నాలుగేళ్లలో 111 మంది జంప్జిలానీలు!
ABN , Publish Date - Sep 26 , 2026 | 05:32 AM
దేశవ్యాప్తంగా 2022 నుంచి ఇప్పటివరకు.. నాలుగేళ్లలో 111 మంది ఎన్నికైన ప్రజాప్రతినిధులు పార్టీలు ఫిరాయించారు. వీరిలో 78 మంది ఎమ్మెల్యేలు కాగా.. 33 మంది ఎంపీలున్నారు.
వీరిలో 33 మంది ఎంపీలు, 78 మంది ఎమ్మెల్యేలు
81 మంది ఎన్పీఎఫ్, బీజేపీ, ఎన్సీపీఐలోకి జంప్
వెల్లడించిన ఏడీఆర్, ఎలక్షన్ వాచ్ సంస్థలు
ఫిరాయింపుల చట్టంలో మార్పులకు సూచన
అనర్హత పిటిషన్లపై నిర్ణయాధికారాన్ని
రాష్ట్రపతి, గవర్నర్లకు బదిలీచేయాలని సిఫారసు
న్యూఢిల్లీ, సెప్టెంబరు 25: దేశవ్యాప్తంగా 2022 నుంచి ఇప్పటివరకు.. నాలుగేళ్లలో 111 మంది ఎన్నికైన ప్రజాప్రతినిధులు పార్టీలు ఫిరాయించారు. వీరిలో 78 మంది ఎమ్మెల్యేలు కాగా.. 33 మంది ఎంపీలున్నారు. ఎంపీల్లోనూ 26 మంది లోక్సభ, ఏడుగురు రాజ్యసభ సభ్యులు. ఈ వివరాలను ప్రజాస్వామ్య సంస్కరణల సంఘం (ఏడీఆర్), నేషనల్ ఎలక్షన్ వాచ్ సంస్థలు వెల్లడించాయి. అత్యధికంగా ఎన్పీఎఫ్లోకి 32మంది ప్రజాప్రతినిధులు రాగా.. బీజేపీలోకి 29 మంది, ఎన్సీపీఐలోకి 20 మంది ఫిరాయించారు. 111మంది ప్రజాప్రతినిధుల్లో 81మంది (73శాతం) ఈ మూడు పార్టీల్లోకే వచ్చారు. ఫిరాయింపుల నిరోధక చట్టంలో పటిష్ఠ మార్పులు తీసుకురావలసిన అవసరం ఉందని ఏడీఆర్, ఎలక్షన్ వాచ్ సూచించాయి. ముఖ్యంగా ఎంపీలపై అనర్హత వేటు పిటిషన్లపై నిర్ణయాధికారాన్ని స్పీకర్/రాజ్యసభ చైర్మన్కు కాకుండా కేంద్ర ఎన్నికల కమిషన్ సిఫారసుతో రాష్ట్రపతికి.. ఎమ్మెల్యేల విషయంలో ఆ అధికారాన్ని గవర్నర్లకు బదిలీ చేయాలని సిఫారసు చేశాయి.