చదివేటప్పుడు నిద్ర ఎందుకు వస్తుందో తెలుసా?

ఇంటర్నెట్ డెస్క్: పిల్లల నుంచి పెద్దల వరకు చాలా మందికి ఒక సాధారణ సమస్య ఉంటుంది. పుస్తకం చదవడానికి కూర్చున్న వెంటనే ఆవలింతలు రావడం, నిద్రమత్తుగా అనిపించడం, చదువుపై దృష్టి పెట్టలేకపోవడం జరుగుతుంది. ముఖ్యంగా పరీక్షల సమయంలో బాగా చదవాలని అనుకున్న విద్యార్థులకు ఈ సమస్య ఎక్కువగా కనిపిస్తుంది.

నిద్రమత్తుకు కారణాలు

పుస్తకం చదివేటప్పుడు మన కళ్ళు ఒకే చోట ఎక్కువసేపు దృష్టి పెడతాయి. దీనివల్ల కంటి కండరాలపై ఒత్తిడి పెరిగి అలసట వస్తుంది. కళ్ళు అలసిపోతే మెదడుకు కూడా విశ్రాంతి అవసరం అవుతుంది. దీంతో నిద్రమత్తు మొదలవుతుంది.

అలాగే చదివేటప్పుడు మెదడు కొత్త విషయాలను అర్థం చేసుకోవడం, గుర్తుంచుకోవడం వంటి పనులు చేస్తుంది. ఈ ప్రక్రియలో మెదడు ఎక్కువ శక్తిని ఉపయోగిస్తుంది. ఎక్కువసేపు చదివితే మెదడు అలసిపోయి శరీరానికి విశ్రాంతి కావాలని సంకేతాలు పంపుతుంది. ఆ సంకేతాలే నిద్ర రూపంలో కనిపిస్తాయి.

చదువుకునే విధానం కూడా కారణమే

చాలామంది నిశ్శబ్దమైన ప్రదేశంలో, ఒకే చోట కూర్చుని చదువుతారు. శరీరం విశ్రాంతి స్థితిలో ఉండటం వల్ల కూడా నిద్ర రావచ్చు. చదివేటప్పుడు కళ్ళు, మెదడు మాత్రమే చురుకుగా ఉంటాయి. శరీరంలోని మిగతా భాగాలు రిలాక్స్‌ అవుతాయి. దీంతో శరీరం సహజంగా విశ్రాంతి తీసుకోవాలని భావిస్తుంది.

నిద్ర రాకుండా ఉండాలంటే ఏం చేయాలి?

వెలుతురులో చదవాలి:

తక్కువ వెలుతురులో చదవడం వల్ల కళ్ళపై ఒత్తిడి పెరుగుతుంది. కాబట్టి తగినంత వెలుతురు ఉన్న ప్రదేశంలో చదవడం మంచిది. గాలి, వెలుతురు బాగా వచ్చే ప్రదేశంలో చదవడం వల్ల మనసు చురుకుగా ఉంటుంది. నిద్రమత్తు తగ్గుతుంది.

మధ్యలో విరామం తీసుకోవాలి:

ఎక్కువసేపు నిరంతరంగా చదవడం వల్ల అలసట పెరుగుతుంది. ప్రతి 30 నుంచి 45 నిమిషాలకు కొన్ని నిమిషాలు విరామం తీసుకుంటే ఏకాగ్రత పెరుగుతుంది.

ఆహారంపై శ్రద్ధ పెట్టాలి:

చదివే ముందు ఎక్కువగా తినడం వల్ల నిద్రమత్తు రావచ్చు. తేలికైన, ఆరోగ్యకరమైన ఆహారం తీసుకోవడం మంచిది.

సరైన భంగిమలో కూర్చొని చదవాలి:

పడుకుని లేదా చాలా రిలాక్స్‌ అయ్యే విధంగా చదవడం వల్ల త్వరగా నిద్ర వస్తుంది. కాబట్టి నిటారుగా కూర్చొని చదవడం అలవాటు చేసుకోవాలి. చదువుతున్నప్పుడు నిద్ర రావడం సాధారణమే అయినప్పటికీ, సరైన పద్ధతులు పాటిస్తే ఏకాగ్రత పెంచుకుని ఎక్కువ సమయం సమర్థవంతంగా చదవవచ్చు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఎలక్ట్రిక్ కారుతో సుదూర ప్రయాణం? ఈ జాగ్రత్తలు తప్పనిసరి

ఎంతటి జ్ఞానవంతుడైనా ఈ తప్పులు చేస్తే కష్టాలు తప్పవు