Putin Mediation Efforts: ఇరాన్పై దాడి.. ట్రంప్ వెనక్కి!
ABN , Publish Date - Jan 17 , 2026 | 04:43 AM
ఇరాన్పై సైనిక చర్య విషయంలో అమెరికా కాస్త వెనక్కి తగ్గింది. ఇప్పుడో, ఇంకాసేపట్లోనో దాడి తథ్యమన్న పరిస్థితి నుంచి.. ఇప్పట్లో సైనిక చర్య ఏదీ చేపట్టే అవకాశం లేదనే దశకు వచ్చింది.
ఇజ్రాయెల్ సహా పలు దేశాల ఒత్తిడితో ఆఖరు నిమిషంలో ఆపిన అమెరికా అధ్యక్షుడు
ఇరాన్తో చర్చల కోసం మధ్యవర్తిత్వానికి సిద్ధమన్న పుతిన్
వాషింగ్టన్, జనవరి 16: ఇరాన్పై సైనిక చర్య విషయంలో అమెరికా కాస్త వెనక్కి తగ్గింది. ఇప్పుడో, ఇంకాసేపట్లోనో దాడి తథ్యమన్న పరిస్థితి నుంచి.. ఇప్పట్లో సైనిక చర్య ఏదీ చేపట్టే అవకాశం లేదనే దశకు వచ్చింది. ప్రస్తుతానికి దాడి వద్దంటూ ఇజ్రాయెల్ ప్రధాని నెతన్యాహు, ఇతర దేశాల నేతలు విజ్ఞప్తి చేయడం.. ఆందోళనకారులకు ఉరిశిక్ష వేయడం అంశంలో ఇరాన్ వెనక్కి తగ్గడంతో ట్రంప్ కాస్త శాంతించినట్టు వైట్హౌజ్ వర్గాలు చెబుతున్నాయి. ఇరాన్పై దాడి వద్దని, ఆ దేశంతో దౌత్యపరమైన చర్చలకు తాము సహకరిస్తామని నెతన్యాహుకు రష్యా అధ్యక్షుడు పుతిన్ విజ్ఞప్తి చేయడం గమనార్హం. ప్రజా ఆందోళనలను పాశవికంగా అణచివేసేందుకు ఇరాన్ ప్రయత్నించడంతో ఆగ్రహించిన ట్రంప్.. పోరాడండి, సాయం వస్తోందని ఇరాన్ నిరసనకారులకు ఇటీవల పిలుపునిచ్చారు. అన్నట్టుగానే ఇరాన్పై సైనిక చర్యకు ఏర్పాట్లు చేపట్టారు. కానీ చివరి నిమిషంలో నెతన్యాహుతోపాటు పలు దేశాల ఒత్తిడితోనే దాడిని వాయిదా వేసుకున్నారని న్యూయార్క్ టైమ్స్ పత్రిక తాజాగా వెల్లడించింది. బుధవారం రాత్రి ట్రంప్తో మాట్లాడిన నెతన్యాహు ఇరాన్పై దాడికి ఇది సరైన సమయం కాదని, ఈ విషయంలో పునరాలోచించాలని వ్యక్తిగతంగా ఒత్తిడి చేశారని పేర్కొంది. ఇరాన్పై దాడి కోసం భారీగా ఆయుధ సంపత్తి, నిధులు అవసరమని.. అదే సమయంలో ఇజ్రాయెల్, అమెరికా మిలిటరీ స్థావరాల మీద ఇరాన్ దాడి చేసే అవకాశమూ ఉందని నెతన్యాహు వివరించినట్టు తెలిపింది. మరోవైపు ఖతార్, యూఏఈ తదితర దేశాలు కూడా ప్రస్తుతానికి దాడి వద్దని.. దౌత్యపరంగా, ఇతర మార్గాల్లో ఒత్తిడి పెంచుదామని కోరినట్టు వైట్హౌజ్ వర్గాలు తెలిపాయి.
ఇరాన్పై దాడి ప్రస్తుతానికి ఉండబోదని ట్రంప్ ప్రత్యేక రాయబారి స్టీవ్ విట్కాఫ్ కూడా పరోక్షంగా వెల్లడించారు. ‘‘ఇరాన్ అధ్యక్షుడితో మాట్లాడాను. ఆందోళనకారులను సామూహికంగా ఉరితీసే నిర్ణయంపై అమెరికా ఆందోళనను వివరించాను. ఆ నిర్ణయాన్ని వెనక్కి తీసుకున్నామని, ఆందోళనకారులకు ఉరిశిక్షలు వేయబోమని ఆయన హామీ ఇచ్చారు. ఇరాన్ అంశంలో దౌత్యపరమైన పరిష్కారం లభిస్తుందని భావిస్తున్నాం’’ అని గురువారం తెలిపారు. అయితే ఐరాస భద్రతా మండలి అత్యవసర సమావేశంలో మాత్రం.. ఇరాన్పై దాడి సహా అన్ని అవకాశాలను పరిశీలిస్తున్నామని అమెరికా పేర్కొంది.
ఇరాన్, ఇజ్రాయెల్ నేతలతో పుతిన్ చర్చలు
ఇరాన్పై దాడికి అమెరికా సిద్ధమవడం, పశ్చిమాసియా ప్రాంతంలో ఉద్రిక్తతల నేపథ్యంలో.. ఇజ్రాయెల్ ప్రధాని నెతన్యాహు, ఇరాన్ అధ్యక్షుడు మసౌద్ పెజెష్కియాన్తో రష్యా అధ్యక్షుడు పుతిన్ శుక్రవారం వేర్వేరుగా చర్చలు జరిపారు. శాంతి నెలకొల్పేందుకు రాజకీయ, దౌత్యపరమైన మార్గాలను అనుసరించాలని కోరారు. ఈ అంశంలో కలసి పనిచేద్దామన్నారు. ఇరాన్తో చర్చలకు మధ్యవర్తిత్వం వహించేందుకు సిద్ధంగా ఉన్నామని చెప్పారు.
ట్రంప్.. ఈసారి బుల్లెట్ మిస్సవదు!
ఇరాన్పై దాడి చేస్తామన్న అమెరికా అధ్యక్షుడు ట్రంప్ను పరోక్షంగా హెచ్చరిస్తూ ఇరాన్ అధికారిక టీవీ ఓ కథనం ప్రసారం చేసింది. అమెరికాలో అధ్యక్ష ఎన్నికల ప్రచార సమయంలో ట్రంప్పై హత్యాయత్నం జరిగిన విషయం తెలిసిందే. ఓ దుండగుడు జరిపిన కాల్పుల్లో ట్రంప్ చెవిని తాకుతూ బుల్లెట్ దూసుకెళ్లింది. ఆనాటి చిత్రాన్ని, దాని కింద ‘ఈసారి బుల్లెట్ లక్ష్యాన్ని మిస్సవదు’ అని రాసిన ప్లకార్డును పట్టుకున్న వ్యక్తి దృశ్యాలను పదే పదే ప్రసారం చేసింది.
