పెన్షనర్ల హక్కులకై పోరాటం

తమ జీవితాన్ని ప్రజాసేవకు అంకితం చేసిన ఉద్యోగులు పదవీ విరమణ అనంతరం గౌరవప్రదమైన జీవితం గడపడానికి పెన్షన్ ప్రధాన ఆధారం. అయితే ఇటీవలి పరిణామాలు దేశవ్యాప్తంగా పెన్షనర్లలో ఆందోళన కలిగిస్తున్నాయి. ముఖ్యంగా వాలిడేషన్ చట్టం ప్రవేశపెట్టడం, పెన్షన్ ప్రయోజనాలపై పరిమితులు విధించే ప్రయత్నాలు, పెన్షనర్ల మధ్య వర్గీకరణ వంటి అంశాలు చర్చకు దారి తీస్తున్నాయి. ఈ పరిస్థితుల్లో పెన్షనర్ల హక్కులను కాపాడుకోవడం అత్యవసరం అయింది.

అఖిల భారత రాష్ట్ర పెన్షనర్ల సమాఖ్య పిలుపు మేరకు మార్చి 25న ‘బ్లాక్ డే’గా పాటిస్తున్నారు. ఈ నిరసన కార్యక్రమం దేశమంతటా పెన్షనర్ల ఐక్యతకు ప్రతీక. ఈ రోజు పెన్షనర్లు నిరసన బ్యాడ్జ్‌లు ధరించి, జిల్లా కలెక్టర్లకు వినతిపత్రాలు అందజేస్తూ, భారత ప్రధానమంత్రికి తమ ఆవేదనను తెలియజేస్తున్నారు. ఇది పూర్తిగా ప్రజాస్వామ్య పద్ధతిలో, శాంతియుతంగా జరుగుతున్న ఉద్యమం. పెన్షన్ అనేది ప్రభుత్వమిచ్చే దానం కాదు. అది ఉద్యోగి తన సేవా కాలంలో సంపాదించిన వాయిదా పడిన జీతం. వయస్సు పెరిగే కొద్దీ ఆరోగ్య సమస్యలు, వైద్య ఖర్చులు పెరుగుతాయి. అటువంటి సమయంలో పెన్షన్ ఒక ముఖ్యమైన జీవనాధారం అవుతుంది. అందువల్ల పెన్షన్ హక్కులను తగ్గించే లేదా పరిమితం చేసే చర్యలు పెన్షనర్లలో సహజంగానే ఆందోళన కలిగిస్తాయి. పెన్షన్ హక్కుల విషయంలో సుప్రీంకోర్టు ఇప్పటికే స్పష్టమైన మార్గదర్శకాలు ఇచ్చింది.

ఇటీవల ప్రవేశపెట్టిన వాలిడేషన్ చట్టం పెన్షనర్లలో తీవ్ర ఆందోళనకు కారణమైంది. ముఖ్యంగా పాత పెన్షన్ విధానం కింద పదవీ విరమణ చేసిన ఉద్యోగులను 2026 జనవరి 1కి ముందు, ఆ తర్వాత పదవీ విరమణ చేసిన వారిగా విభజిస్తున్నారనే అభిప్రాయం వ్యక్తమవుతోంది. ఈ విధంగా వర్గీకరణ చేయడం ద్వారా 7వ వేతన సవరణ సంఘం ప్రయోజనాలను పరిమితం చేయాలనే ప్రయత్నం జరుగుతోందని పెన్షనర్లు భావిస్తున్నారు. ఇది సమానత్వ సూత్రానికి విరుద్ధం. ఒకే విధమైన సేవలు చేసిన ఉద్యోగుల మధ్య ఇలా తేడాలు చూపడం న్యాయసమ్మతం కాదు.

ఇంకో ముఖ్యమైన అంశం భాగస్వామ్య పెన్షన్ విధానం గురించి. భవిష్యత్తులో వారికి స్థిరమైన ఆర్థిక భద్రత లభిస్తుందా అనే సందేహాలు పెరుగుతున్నాయి. దేశవ్యాప్తంగా భాగస్వామ్య పెన్షన్ విధానం కింద ఉన్న ఉద్యోగులను పాత పెన్షన్ విధానంలోకి మార్చాలని పెన్షనర్ల సంఘాలు డిమాండ్ చేస్తున్నాయి. ఇది ఉద్యోగుల భవిష్యత్ భద్రతను కాపాడటానికి, సామాజిక న్యాయాన్ని నిలబెట్టడానికి అవసరమని వారు అభిప్రాయపడుతున్నారు.

ఇదే సమయంలో పెన్షనర్లు ప్రభుత్వం దృష్టికి తీసుకువస్తున్న మరికొన్ని డిమాండ్లు కూడా ఉన్నాయి. కమ్యూటేషన్ వసూలు ప్రక్రియను ఏకరీతి విధానంలో అమలు చేసి 12 సంవత్సరాలలో పూర్తిచేయాలి. పదవీ విరమణ అనంతరం ప్రతి ఐదు సంవత్సరాలకు 5శాతం అదనపు పెన్షన్ పెంపు ఇవ్వాలని పార్లమెంటరీ కమిటీ చేసిన సిఫార్సును అమలు చేయాలి. పెండింగ్‌లో ఉన్న పెన్షనరీ ప్రయోజనాలను విడుదల చేసి, వేతన సవరణ అమలు చేయాలి. ధరల పెరుగుదల భత్యం బకాయిలను చెల్లించాలి.

ఆంధ్రప్రదేశ్‌లో కూడా పెన్షనర్లు కొన్ని ప్రత్యేక సమస్యలను ఎదుర్కొంటున్నారు. ముఖ్యంగా పెన్షనర్ల కోసం ప్రత్యేక డైరెక్టరేట్‌ను ఏర్పాటు చేయాలని ఎన్నికల ప్రకటనలో హామీ ఇచ్చిన అంశాన్ని త్వరగా అమలు చేయాలి. అలాగే పెన్షన్ నియమాలలో ప్రతిపాదిత మార్పులు ఉద్యోగులు, భవిష్యత్ పెన్షనర్లకు నష్టం కలిగించే అవకాశం ఉన్నందున వాటిని పునర్విచారించాల్సిన అవసరం ఉంది.

దేశవ్యాప్తంగా సమానత్వం, న్యాయం, సామాజిక భద్రత అనే విలువలను కాపాడే విధంగా పెన్షన్ విధానాలు ఉండాలి. మార్చి 25న నిర్వహిస్తున్న బ్లాక్ డే/ నిరసన దినం ద్వారా పెన్షనర్లు తమ హక్కులను కాపాడుకోవాలనే సంకల్పాన్ని దేశానికి తెలియజేస్తున్నారు. ప్రభుత్వం ఈ ఆవేదనను గమనించి తగిన చర్యలు తీసుకుంటుందని దేశవ్యాప్తంగా ఉన్న పెన్షనర్లు ఆశిస్తున్నారు.

టి.ఎం.బి. బుచ్చిరాజు

ప్రత్యేక ఆహ్వానితుడు,

అఖిల భారత రాష్ట్ర పెన్షనర్ల సమాఖ్య

ఇవి కూడా చదవండి..

5 రోజుల పాటు దాడులు నిలిపివేస్తున్నాం.. ట్రంప్ కీలక ప్రకటన

అమెరికాతో ఎలాంటి చర్చలు జరపడం లేదు: ఇరాన్