ప్రభావశీల మహిళల చేతుల్లో రూ.39 లక్షల కోట్ల ఆస్తులు

క్యాండేర్‌ హురున్‌ ఇండియా విమెన్‌ లీడర్స్‌ జాబితా విడుదల

జాబితాలో రోష్ని నాడార్‌, ప్రియా నాయర్‌, అపోలో సిస్టర్స్‌

న్యూఢిల్లీ: దేశంలో పారిశ్రామిక, వ్యాపార రంగాలతో పాటు పలు రంగాల్లో అత్యంత ప్రభావవంతమైన మహిళలతో కూడిన 2026 క్యాండేర్‌ హురున్‌ ఇండియా విమెన్‌ లీడర్స్‌ జాబితా గురువారం విడుదలైంది. ఈ జాబితాలో 117 మంది మహిళలకు స్థానం లభించింది. గతేడాది జాబితాలోని 97 మందితో పోల్చితే ఈసారి 21 శాతం పెరిగారు. ఈ జాబితాలో చోటు సంపాదించుకున్న మహిళల నిర్వహణలోని సంస్థల ఎంటర్‌ప్రైజ్‌ విలువ, మార్కెట్‌ క్యాపిటలైజేషన్‌, సంపద రూ.39 లక్షల కోట్లుగా ఉంది. ఈ మొత్తం ఫిన్లాండ్‌ జీడీపీకన్నా అధికం కావడం విశేషం. గత ఏడాది జాబితాలో 9 విభాగాలు ఉండగా.. ఈసారి 12 విభాగాలతో జాబితా రూపొందించారు. జాబితాలోని 117 మందిలో 84 శాతం మంది సొంత కష్టంతో ఎదిగినవారే కావడం విశేషం.

• కేటగిరీల విషయానికి వస్తే.. ‘వెల్త్‌ మల్టీప్లయర్స్‌’ విభాగంలో హెచ్‌సీఎల్‌ టెక్‌ చైర్‌పర్సన్‌ రోష్ని నాడార్‌ మల్హోత్రా అగ్రస్థానంలో నిలిచారు. ఈమె నెట్‌వర్త్‌ రూ.2.84 లక్షల కోట్లు.

• ‘ప్రొఫెషనల్‌ సీఈఓ’ విభాగంలో హిందుస్థాన్‌ యూనిలీవర్‌ (హెచ్‌యూఎల్‌) సీఈఓ, మేనేజింగ్‌ డైరెక్టర్‌ ప్రియా నాయర్‌ ప్రథమ స్థానాన్ని సొంతం చేసుకున్నారు. ఈమె రూ.5,06,600 కోట్ల విలువైన కంపెనీకి నాయకత్వం వహిస్తున్నారు .

• అపోలో హాస్పిటల్స్‌కు చెందిన ప్రీతా రెడ్డి (68), సునీతా రెడ్డి (67)లు సంయుక్తంగా ‘వెటరన్స్‌ కేటగిరీ’లో అగ్రస్థానంలో ఉన్నారు. వీరి గ్రూప్‌ విలువ రూ.1,21,000 కోట్లకు మించి ఉంది.

• రెన్యూ పవర్‌ సహ వ్యవస్థాపకురాలు వైశాలి నిగమ్‌ సిన్హా ‘న్యూ ఎకానమీ’ కేటగిరీలో ప్రథమ స్థానంలో ఉన్నారు. ఈ కంపెనీ విలువ రూ.22,230 కోట్లుగా ఉంది.

• ఈ జాబితాలోని వారి సగటు వయసు 48 ఏళ్లు. 19 నుంచి 86 ఏళ్ల మధ్య వయసు వారు జాబితాలో ఉన్నారు.

ఈ వార్తలనూ చదవండి:

కువైట్‌లోని చైనా కంపెనీపై ఇరాన్ దాడి

కుట్రపూరిత వీసా కేసు.. అమెరికా నుంచి భారతీయుడి బహిష్కరణ