వెండి దిగుమతులపై తక్షణ ఆంక్షలు.. 'ఫ్రీ' నుంచి 'రిస్ట్రిక్టెడ్' కేటగిరీలోకి మార్పు!

న్యూఢిల్లీ, మే 16: దేశంలోకి విపరీతంగా పెరుగుతున్న వెండి (Silver) ఇన్‌ఫ్లోను నియంత్రించడానికి, పెరుగుతున్న వాణిజ్య లోటును అరికట్టడానికి కేంద్ర ప్రభుత్వం ఒక కీలక నిర్ణయం తీసుకుంది. వెండి దిగుమతులకు సంబంధించి అంతకుముందు ఉన్న సరళీకృత విధానాన్ని మారుస్తూ డైరెక్టరేట్ జనరల్ ఆఫ్ ఫారిన్ ట్రేడ్ (DGFT) తాజా అధికారిక ఉత్తర్వులు జారీ చేసింది. ఈ నూతన నిబంధనలు తక్షణమే అమలులోకి వస్తాయని స్పష్టం చేసింది.

'ఫ్రీ' టు 'రిస్ట్రిక్టెడ్' (Free to Restricted):

తాజా నోటిఫికేషన్ ప్రకారం.. దేశంలోకి వెండి బార్స్ (Silver Bars), అన్‌రాట్ సిల్వర్ (Unwrought Silver)సిల్వర్ పౌడర్‌తో కూడిన సెమీ-మాన్యుఫాక్చర్డ్ వెండి దిగుమతులను 'ఫ్రీ' (ఉచిత/ఎలాంటి అనుమతులు అవసరం లేని) కేటగిరీ నుంచి 'రిస్ట్రిక్టెడ్' (పరిమిత) కేటగిరీలోకి మార్చారు. దీని అర్థం ఇకపై విదేశాల నుంచి భారతదేశంలోకి వెండిని పెద్ద మొత్తంలో దిగుమతి చేసుకోవాలంటే వ్యాపారులు లేదా సంస్థలు కచ్చితంగా ప్రభుత్వం (DGFT) నుంచి ముందస్తు అనుమతి లేదా లైసెన్స్ పొందడం విధిగా మారింది.

ఆంక్షలకు ప్రధాన కారణాలు ఏంటి?

1.ట్రేడ్ డెఫిసిట్ నియంత్రణ: దేశంలో విలువైన లోహాల దిగుమతి బిల్లు విపరీతంగా పెరిగిపోతుండటం వల్ల విదేశీ మారక ద్రవ్యంపై ఒత్తిడి పడుతోంది. దీన్ని అదుపు చేయడం కేంద్రం ప్రధాన లక్ష్యం.

2. లూప్‌హోల్స్‌కు అడ్డుకట్ట: ఉచిత వాణిజ్య ఒప్పందాలు (FTAs) ఉన్న థాయిలాండ్, ఆసియాన్ (ASEAN) దేశాల నుంచి కొన్ని సంస్థలు డ్యూటీలు (సుంకాలు) ఎగ్గొట్టడానికి, ఇతర మార్గాల్లో వెండిని భారత్‌లోకి అక్రమంగా తరలిస్తున్నట్లు ప్రభుత్వ పరిశీలనలోకి వచ్చింది. ఈ లూప్‌హోల్స్‌ను పూర్తిగా క్లోజ్ చేయడానికి ఈ నిర్ణయం తీసుకున్నారు.

3. స్థానిక మార్కెట్‌కు రక్షణ: దేశీయంగా ఉన్న వెండి వ్యాపారులు, తయారీదారుల ప్రయోజనాలను కాపాడటానికి కూడా ఈ ఆంక్షలు ఉపయోగపడతాయని నిపుణులు భావిస్తున్నారు.

ఆర్‌బీఐ రూల్స్ తప్పనిసరి.. బంగారంపై కూడా నిఘా!

ఈ కొత్త ఫ్రేమ్‌వర్క్ కింద కొన్ని నిర్దిష్ట కేటగిరీల వెండి దిగుమతులు ఇకపై రిజర్వ్ బ్యాంక్ ఆఫ్ ఇండియా (RBI) నిబంధనలకు లోబడి కూడా ఉండాల్సి వస్తుంది. వెండి మాత్రమే కాకుండా, డ్యూటీ-ఫ్రీ బంగారం (Duty-free Gold) దిగుమతులపై కూడా కేంద్రం నిఘా పెంచింది. ఒక లైసెన్స్‌పై గరిష్ఠంగా 100 కేజీల బంగారానికి మాత్రమే పరిమితి విధిస్తూ రూల్స్ కఠినతరం చేసింది.

ఈ ఆంక్షల ప్రభావం అంతర్జాతీయ, స్థానిక బులియన్ మార్కెట్‌పై, ముఖ్యంగా రాబోయే రోజుల్లో వెండి ధరల హెచ్చుతగ్గులపై పడే అవకాశం ఉందని మార్కెట్ విశ్లేషకులు అంచనా వేస్తున్నారు.

ఇవి కూడా చదవండి..

బొద్దింకల్లా వ్యవస్థపై దాడి చేస్తున్నారు

సీఎం విజయ్, మంత్రులకు శాఖలను కేటాయిస్తూ లోక్ భవన్ ప్రకటన..