భారతీయుల మనీవాలెట్ వరుస మారుతోంది!

ఆంధ్రజ్యోతి, సెప్టెంబర్ 8: జీతం చేతికి అందగానే కొత్త ఫోన్ కొనడం, కారు కొనడం లేదా విహారయాత్రలకు వెళ్లడం గురించి ఎక్కువగా ఆలోచించే భారతీయ కుటుంబాలు, ఇప్పుడు తమ ప్రాధాన్యతలను మార్చుకుంటున్నాయి. ప్రతి నెలా వచ్చే ఆదాయంలో ఎంత మొత్తం సొంత ఇంటి కోసం కేటాయించాలి, ఎంత పొదుపు లేదా పెట్టుబడి పెట్టాలి, ఆపత్కాల నిధి (Emergency Fund) ఎంత దాచుకోవాలనే అంశాలపై ప్రధానంగా దృష్టి సారిస్తున్నాయి. 'హోమ్ క్రెడిట్ ఇండియా' ఇటీవల విడుదల చేసిన 'ది గ్రేట్ ఇండియన్ వాలెట్ 2026' నాల్గవ ఎడిషన్ నివేదిక ప్రకారం, భారతీయ వినియోగదారులు కేవలం వస్తువులను కొనుగోలు చేయడం నుంచి భావి తరాల కోసం ఆస్తులను సృష్టించే వైపు వేగంగా అడుగులు వేస్తున్నారు.

సొంతింటి స్వప్నమే అగ్రస్థానం

వినియోగదారుల ఆర్థిక లక్ష్యాలలో సొంత ఇల్లు కొనుగోలు చేయడం అత్యంత కీలకమైన అంశంగా మారింది. నివేదిక ప్రకారం, సర్వేలో పాల్గొన్న వారిలో 31శాతం మంది రాబోయే ఐదేళ్లలో సొంత ఇల్లు కొనాలని లక్ష్యంగా పెట్టుకున్నారు. మహిళల్లో ఈ ఆకాంక్ష మరీ ఎక్కువగా ఉంది. దాదాపు 40శాతం మంది మహిళలు సొంతింటి కలను తమ ప్రధాన ఆర్థిక లక్ష్యంగా పేర్కొన్నారు.

పెరుగుతున్న పొదుపు, పెట్టుబడులు

ఖర్చుల కంటే పొదుపుకే భారతీయులు ఇప్పుడు ప్రాధాన్యత ఇస్తున్నారు. సర్వేలోని 46శాతం మంది తాము గతంతో పోలిస్తే పొదుపు పెంచామని చెప్పగా, 44శాతం మంది పెట్టుబడులను పెంచామని తెలిపారు.

తరాల వారీగా చూస్తే, జనరేషన్-జెడ్ (Gen Z) అత్యధికంగా 58శాతం పొదుపు చేస్తూ అగ్రస్థానంలో ఉంది. మిలీనియల్స్ 53శాతం, Gen X 44శాతం మేర పొదుపు చేస్తున్నారు.

యువత వినోదం, స్థానిక పర్యటనల వంటి వాటికి ఖర్చు చేస్తున్నప్పటికీ, దానికి సమాంతరంగా పెద్ద ఆర్థిక లక్ష్యాల కోసం పొదుపు చేయడాన్ని అలవాటు చేసుకుంటున్నారు.

ఆస్తి సృష్టి, వ్యాపార ఆకాంక్షలు

ఇంటి కొనుగోలుతో పాటు సొంతంగా వ్యాపారాన్ని ప్రారంభించడం లేదా ఉన్న వ్యాపారాన్ని విస్తరించడం కూడా ఒక ముఖ్య లక్ష్యంగా మారింది. 25శాతం మంది రాబోయే ఐదేళ్లలో నూతన వ్యాపారం వైపు అడుగులు వేయాలని భావిస్తున్నారు. Gen Z వర్గంలో ఇది అత్యధికంగా 31శాతంగా ఉంది. పురుషులలో 26శాతం, మహిళల్లో 20శాతం మంది వ్యాపార ఆలోచనలను కలిగి ఉన్నారు.

కుటుంబ బడ్జెట్ సవాళ్లు

మరొకవైపు, దిగువ మధ్యతరగతి కుటుంబాలలో బడ్జెట్ ఒత్తిడి కొనసాగుతూనే ఉంది. సగటున నెలకు రూ. 35,000 ఆదాయం ఉండగా, అందులో రూ. 21,000 ప్రాథమిక అవసరాలకే ఖర్చవుతోంది. మెట్రో నగరాల్లో సగటు ఆదాయం రూ. 38,000 కాగా, అవసరాలకు రూ. 22,000 ఖర్చు అవుతోంది.

గృహ ఖర్చుల భారాన్ని అత్యధికంగా Gen X (70శాతం) మోస్తుండగా, మిలీనియల్స్ (68శాతం), Gen Z (57శాతం) తర్వాతి స్థానాల్లో ఉన్నారు.

ఆర్ధిక విశ్వాసం, క్రెడిట్ వినియోగం

పరిమిత ఆదాయాలు ఉన్నప్పటికీ, వినియోగదారులలో ఆర్థిక విశ్వాసం పెరుగుతోంది. 'ఫైనాన్షియల్ వెల్-బీయింగ్ ఇండెక్స్' 2026 నాటికి 40 పాయింట్లకు పెరిగింది (గతంలో 34 పాయింట్లు).

85శాతం మంది రాబోయే ఐదేళ్లలో తమ ఆర్థిక లక్ష్యాలను సాధించగలమని ధీమా వ్యక్తం చేశారు. క్రెడిట్ కార్డ్‌లు, EMIలను కేవలం తక్షణ అవసరాలకు మాత్రమే కాకుండా, ముందస్తుగా ప్రణాళిక వేసుకున్న పెద్ద కొనుగోళ్లకు వినియోగిస్తున్నారు. Gen Z లో 64శాతం మంది ప్లాన్ చేసిన కొనుగోళ్లకు రుణాలు వాడటానికి మొగ్గు చూపుతున్నారు.

డిజిటల్ చెల్లింపులు (49శాతం), డిజిటల్ రుణాలు (51శాతం) వేగంగా విస్తరిస్తున్నాయి. అలాగే 57శాతం మంది సరైన ఆర్థిక నిర్ణయాల కోసం నిపుణుల సలహాలు (Professional Advice) కోరుకుంటున్నారు.

సొంత ఇల్లు, పొదుపు, పెట్టుబడులు, వ్యాపార సృష్టి వైపు భారతీయ వాలెట్ మళ్లుతుండటం దేశ ఆర్థిక వ్యవస్థలో ఒక సానుకూల పరిణామంగా నిపుణులు భావిస్తున్నారు.

ఈ వార్తలు కూడా చదవండి

కేసీఆర్ చావును కోరుకుంటున్న సీఎం రేవంత్: వేముల ప్రశాంత్ రెడ్డి

బీఆర్‌ఎస్ దాడిలో గాయపడ్డ మహిళా పోలీసులకు మంత్రి సీతక్క పరామర్శ