కొండలను తవ్వేస్తున్నారు

గంగవరంలో గ్రావెల్‌ మాఫియా

అధికారులు నామమాత్రపు దాడులు

ఫిర్యాదు చేస్తున్నా పట్టించుకోవడం లేదంటున్న ప్రజలు

కొయ్యలగూడెం, ఆగస్టు 5(ఆంధ్రజ్యోతి):కొయ్యలగూడెం మండలంలో గ్రావెల్‌, మట్టి మాఫియాకు అడ్డూ అదుపు లేకుండా పోయింది. పగలు, రాత్రి తేడా లేకుండా యథేచ్ఛగా తవ్వకాలు చేస్తున్నారు. రాజవరం పంచాయతీలోని గంగవరం గ్రామ పరిధిలో ఉన్న కొండలన్నీ మటుమాయం అవుతున్నాయి. ఈ ప్రాంతంలో ఆహ్లాదకరమైన కొండలు ప్రస్తుతం నేలమట్టం అయ్యాయి. వైసీపీ ప్రభుత్వం నుంచి అక్రమార్కులు ఈ కొండలను తవ్వేస్తూ వస్తున్నారు. కూటమి ప్రభుత్వం వచ్చాక కూడా ఈ అక్రమార్కులను అరికట్టలేకపోయారు. కూటమి ముఖ్యనాయకుల అండదండలు ఉండటం వలనే ఈ దందా కొనసాగుతుందంటూ ఆరోపణలు వస్తున్నాయి. చెరువుల్లో మట్టి మాఫియా అనంతరం ఈ మాఫియా కొండల వైపు పడింది. రెండు నెలలుగా రాజవరం, గంగవరం ప్రాంతాల్లో యఽథేచ్ఛగా గ్రావెల్‌ తరలిస్తున్నారు. వేలాది రూపాయ లు చేతులు మారుతున్నా అధికారులు చూసీచూడనట్టు వ్యవస్తు న్నారని ఆరోపణలు వెల్లువెత్తుతున్నాయి. రాజవరం పంచాయతీలోని 312, 207 సర్వే నంబర్‌లలో ఉన్న ఈ కొండలన్నీ దాదాపు కనుమరుగయ్యాయి. అధికారులకు సమాచారం ఇస్తున్నా పట్టించు కోవడం లేదని గ్రామస్థులు ఆరోపిస్తున్నారు. మొక్కుబడిగా ఏదో ఒక లారీని పట్టుకున్నట్టు చూపించి మరలా వదిలేస్తు న్నారని ఆరోపిస్తున్నారు. ఉన్నతాధికారులకు ఫిర్యాదు చేసినా వాపోతున్నారు. గతంలో పవన్‌కల్యాణ్‌ ఈ ప్రాంతంలో పర్యటించినప్పుడు ఆయనకు గ్రామ స్థులు ఫిర్యాదు చేయడంతో జిల్లా అధికారులు స్పందించి కేసులు నమోదు చేశారు. కొంతకాలం ఆ ప్రాంతంలో తవ్వకాలు ఆగాయని మరలా ఇటీవల అక్రమార్కులు చెలరేగిపోతున్నారని ప్రజలు వాపోతున్నారు.

చర్యలు తీసుకోకుంటే పవన్‌ దృష్టికి తీసుకెళ్తాం : కూటమి నాయకులు

ఈ ప్రాంతంలో అక్రమ తవ్వకాలు చేస్తున్నారని ఒక వైసీపీ నాయకుడు ఈ తవ్వకాలను యథేచ్ఛగా సాగిస్తున్నాడంటూ కూటమి నాయకులు కొంతమంది ఇటీవల ఆందోళనకు దిగారు. ఆ ప్రాంతానికి వెళ్లి పరిశీలించి, అక్రమ మైనింగ్‌ తవ్వకాలను అరికట్టాలంటూ నినాదాలు చేశారు. అయినప్పటికీ తవ్వకాలు కొనసాగడం గమనార్హం. మంగళవారం మైనింగ్‌, రెవెన్యూ అధికారులు ఆప్రాంతానికి వెళ్లి పరిశీలించారు. కేవలం తూతూమంత్రపు పరిశీలనతోనే సరిపెడుతున్నారే తప్పా చర్యలు తీసుకోవడం లేదని ఆ ప్రాంత ప్రజలు విమర్శిస్తున్నారు. జిల్లా అధికారులు స్పందించి అక్రమ తవ్వకాలను అరికట్టా లని రాజవరం, గంగవరం గ్రామస్థులు డిమాండ్‌ చేస్తున్నారు. ఉన్నతాధికారు లు స్పందించకపోతే ఈ సమస్యను ఉపముఖ్యమంత్రి పవన్‌ కల్యాణ్‌ దృష్టికి తీసుకెళ్లతామని కూటమి నాయకులు పేర్కొంటున్నారు.