Steps Taken to Expedite Resurvey రీసర్వే వేగవంతానికి చర్యలు

పార్వతీపురం, ఆగస్టు3(ఆంధ్రజ్యోతి): జిల్లాలో భూముల రీ సర్వే వేగవంతానికి చర్యలు తీసుకోవాలని ఇన్‌చార్జి జాయింట్‌ కలెక్టర్‌ ఆర్‌.వైశాలి ఆదేశించారు. సోమవారం కలెక్టరేట్‌లో తహసీల్దార్లతో సమీక్షించారు. రెవెన్యూ సమస్యల పరిష్కారంతో పాటు భూ రీసర్వే ప్రక్రియకు అధిక ప్రాధాన్యం ఇవ్వాలన్నారు. ఈ విషయంలో అలసత్వం వహించరాదన్నారు. క్షేత్రస్థాయిలో పరిశీలించి నిర్ణీత గడవులో పనులు పూర్తి చేయాలని సూచించారు. పీజీఆర్‌ఎస్‌ అర్జీలు పెండింగ్‌ంలో లేకుండా చూడాలన్నారు. సరిహద్దు వివాదాలు, రెవెన్యూ రికార్డుల దిద్దుబాట్లుపై ప్రత్యేకంగా దృష్టిసారించాలని ఆదేశించారు. ఈ సమావేశంలో పాలకొండ సబ్‌ కలెక్టర్‌ పవార్‌ స్వప్నిల్‌ జగన్నాథ్‌, ఆర్డీవో మాధురి, రెవెన్యూ అధికారులు పాల్గొన్నారు.

తక్కువ ధరకే నాణ్యమైన బియ్యం

బెలగాం: సామాన్య, మధ్య తరగతి ప్రజలకు ఉపశమనం కలిగించేలా తక్కువ ధరకే ప్రభుత్వం నాణ్యమైన బియ్యం పంపిణీ చేస్తోందని ఇన్‌చార్జి జేసీ వైశాలి తెలిపారు. పట్టణంలో రైతు బజార్లు, రైస్‌మిల్లుల అవుల్‌ లెట్‌ స్టోర్లలో సోమవారం బియ్యం విక్రయ కార్యక్రమాన్ని పరిశీలించారు. ఈ ప్రత్యేక కౌంటర్‌ ద్వారా స్టీమ్‌ బియ్యం కిలో రూ.52, రా బియ్యం రూ.50కు విక్రయిస్తున్నట్టు తెలిపారు. ప్రజలపై ఆర్థిక భారం పడకుండా రైస్‌మిల్లర్ల భాగస్వామ్యంతో ప్రభుత్వం ఈ కార్యక్రమం చేపట్టిందని వెల్లడించారు. మార్కెట్‌లో ధరలను నియంత్రించడంతో పాటు ప్రజలకు నాణ్యమైన బియ్యం అందించడమే లక్ష్యంగా సర్కారు పనిచేస్తోందన్నారు. ఈ కార్యక్రమంలో పౌర సరఫరాల శాఖాధికారులు, సిబ్బంది పాల్గొన్నారు.