Must Be Increased వేతనదారుల సంఖ్య పెంచాల్సిందే..

గరుగుబిల్లి, ఏప్రిల్‌1(ఆంధ్రజ్యోతి): జిల్లాలో వేతనదారుల సంఖ్య పెంచి.. పూర్తిస్థాయిలో పనులు కల్పించాలని డ్వామా పీడీ కె.రామచంద్రరావు ఆదేశించారు. లేకుంటే సంబంధిత సిబ్బందిపై వేటు తప్పదని హెచ్చరించారు. బుధవారం రావుపల్లిలో ఉపాధి హామీ పనులను ప్రారంభించారు. ఈ సందర్భంగా ఆయన మాట్లాడుతూ..‘ 15 మండలాల పరిధిలోని 450 పంచాయతీల్లో నూతనంగా ఉపాధి పనులు ప్రారంభమయ్యాయి. గతేడాది 1.75 లక్షల కుటుంబాలకు చెందిన 2.94 లక్షల మంది వేతనదారులు పనుల్లో పాల్గొన్నారు. ఈ ఏడాదిలో ప్రతి మండలంలో రోజుకు పదివేల మంది వేతనదారులకు పనులు కల్పించాలి. నిబంధనల మేరకు మస్తర్లు వేయకుంటే మేట్లును తొలగిస్తాం. ఎండల దృష్ట్యా ఉదయం 6 గంటల నుంచి 11లోపు , సాయంత్రం 4 గంటల నుంచి పనులు చేపట్టాలి. ’ అని తెలిపారు. ఈ కార్యక్రమంలో రాష్ట్ర ఉపాధి కౌన్సిల్‌ మెంబర్‌ ఎ.లావణ్యకుమార్‌, సర్పంచ్‌ బి.మహేష్‌, పార్వతీపురం ఏపీడీ పి.త్రివిక్రమరావు, ఏపీవో ఈశ్వరమ్మ, జేఈ తేజేశ్వరరావు తదితరులు పాల్గొన్నారు.