HPV Vaccine బాలికలకు ఉచితంగా హెచ్‌పీవీ వ్యాక్సిన్‌

బెలగాం, మార్చి9(ఆంధ్రజ్యోతి): జిల్లాలో 14-15 ఏళ్లు నిండిన బాలికలకు ఉచితంగా హెచ్‌పీవీ వ్యాక్సిన్‌ వేయనున్నట్లు కలెక్టర్‌ ప్రభాకర్‌రెడ్డి తెలిపారు. గర్భాశయ ముఖద్వార (సెర్వికల్‌) క్యాన్సర్‌ నివారణే లక్ష్యంగా ప్రతి ఒక్కరూ పనిచేయాలని కోరారు. సోమవారం జిల్లాకేంద్రాసుపత్రిలో హెచ్‌పీవీ వ్యాక్సినేషన్‌ను ప్రారంభించారు. ఈ సందర్భంగా ఆయన మాట్లాడుతూ.. జిల్లాలో పకడ్బందీగా వ్యాక్సినేషన్‌ చేపట్టాలన్నారు. 14 ఏళ్లు నిండిన పది వేల మంది బాలికలకు హెచ్‌పీవీ వ్యాక్సిన్‌ వేయాలన్నారు. రాబోయే మూడు నెలల్లో ఈ ప్రక్రియను పూర్తి చేయాలని తెలిపారు. వ్యాక్సిన్‌ ధర రూ.4 వేలు అయినా.. ప్రజారోగ్యం దృష్ట్యా ప్రభుత్వం దీనిని ఉచితంగా అందిస్తోందన్నారు. ప్రతి ఒక్కరూ సద్వినియోగం చేసుకోవాలని, క్యాన్సర్‌ రాకుండా జాగ్రత్తలు తీసుకోవాలని సూచించారు. ఈ కార్యక్రమంలో డీసీహెచ్‌ఎస్‌ నాగభూషణ రావు, డీఎంహెచ్‌వో భాస్కరరావు తదితరులు పాల్గొన్నారు.