స్వచ్ఛ సంక్రాంతి గ్రామసభల సందడి

జిల్లా వ్యాప్తంగా నిర్వహణ

10 వరకు ప్రత్యేక పారిశుధ్య కార్యక్రమాలు

పాడేరు, జనవరి 5(ఆంధ్రజ్యోతి): గ్రామ పంచాయతీల బలోపేతంతో పాటు పల్లెల్లోని పారిశుధ్యం మెరుగుకు ప్రత్యేక చర్యలు చేపట్టాలనే లక్ష్యంతో జిల్లా వ్యాప్తంగా సోమవారం ప్రతి గ్రామ పంచాయతీ పరిధిలో ‘స్వచ్ఛ సంక్రాంతి’ గ్రామసభలు నిర్వహించారు. జిల్లాలోని 11 మండలాల్లో 244 గ్రామ పంచాయతీల్లోనూ ఈ గ్రామసభలను నిర్వహించారు. ప్రధానంగా పంచాయతీల పరిధిలోని గ్రామాల్లో పారిశుధ్యాన్ని మెరుగుపరచడంతో పాటు చెత్త సంపద కేంద్రాలను వినియోగంలోకి తీసుకురావడంపై దృష్టి సారించాలనేది ఈ గ్రామసభల ప్రధాన ఉద్దేశం. అలాగే పంచాయతీల్లో పారిశుధ్య నిర్వహణకు అవసరమైన తీర్మానాలు, ఆదాయం పెంపు వంటివి ఈ గ్రామసభల్లో చర్చకు వచ్చాయి. స్వచ్ఛ సంక్రాంతి కార్యక్రమంలో భాగంగా గత ఏడాది డిసెంబరు నుంచి ఈ నెల 4 వరకు గ్రామాల్లో ప్రత్యేక పారిశుధ్య కార్యక్రమాలను చేపట్టాలని నిర్ణయించినప్పటికీ, దానిని ఈ నెల 10వ తేదీ వరకు పొడిగించారు. ఈ క్రమంలో ప్రత్యేక పారిశుధ్య కార్యక్రమాలను మరింత మెరుగ్గా నిర్వహించాలని, జిల్లా వ్యాప్తంగా ఉత్తమ పారిశుధ్య నిర్వహణ చేపట్టిన మూడు గ్రామ పంచాయతీలను ఎంపిక చేయాలని ప్రభుత్వం సూచించింది. ఈ మేరకు ప్రత్యేక పారిశుధ్య నిర్వహణలో ముందున్న మూడు గ్రామ పంచాయతీలకు ఈ నెల 26న నిర్వహించే గణతంత్ర వేడుకల్లో పురస్కారాలను ప్రదానం చేయనున్నారు.