నేటితో తొలి విడత నామినేషన్ల స్వీకరణ సమాప్తం
ABN , Publish Date - Nov 17 , 2026 | 12:29 AM
జిల్లాలో తొలి విడత ఎన్నికలు జరగనున్న గ్రామ పంచాయతీలకు నామినేషన్ల స్వీకరణ గడువు మంగళవారంతో ముగియనున్నది.
రెండు రోజుల్లో సర్పంచులకు 324, వార్డులకు 498 నామినేషన్లు దాఖలు
పాడేరు, నవంబరు 16(ఆంధ్రజ్యోతి): జిల్లాలో తొలి విడత ఎన్నికలు జరగనున్న గ్రామ పంచాయతీలకు నామినేషన్ల స్వీకరణ గడువు మంగళవారంతో ముగియనున్నది. తొలి విడతలో ఎన్నికలు జరిగే చింతపల్లి, జీకేవీధి, కొయ్యూరు మండలాల్లోని మొత్తం 66 పంచాయతీలు, 686 వార్డులకు ఈ నెల 26న ఎన్నికలు జరగనున్నాయి. ఆయా పదవులకు అభ్యర్థుల నుంచి ఈ నెల 15న నామినేషన్ల స్వీకరణ ప్రారంభించగా, ఈ నెల 17తో ఆ ప్రక్రియ ముగియనున్నది. దీంతో ఆది, సోమవారాలు కలిపి సర్పంచులకు 324, వార్డు స్థానాలకు 498 నామినేషన్లు దాఖలయ్యాయని జిల్లా పంచాయతీ అధికారి కేపీ చంద్రశేఖర్ తెలిపారు. మంగళవారంతో గడువు ముగియడంతో ఆఖరు రోజున అధిక సంఖ్యలో నామినేషన్లు దాఖలవుతాయని పలువురు భావిస్తున్నారు.