డ్రైవింగ్ చేస్తుండగా ఫిట్స్
ABN , Publish Date - Sep 30 , 2026 | 11:44 PM
ఆ బస్సులో 40 మంది ప్రయాణికులు ఉన్నారు. మార్గమధ్యలో డ్రైవర్కి ఫిట్స్ రావడంతో వారంతా ఆందోళన చెందారు.
- బస్సును పక్కకు ఆపేసిన డ్రైవర్
- తప్పిన ముప్పు.. ఊపిరి పీల్చుకున్న ప్రయాణికులు
సోంపేట, సెప్టెంబరు 30 (ఆంధ్రజ్యోతి): ఆ బస్సులో 40 మంది ప్రయాణికులు ఉన్నారు. మార్గమధ్యలో డ్రైవర్కి ఫిట్స్ రావడంతో వారంతా ఆందోళన చెందారు. డ్రైవర్ చాకచక్యంగా వ్యవహరించి బస్సును పక్కకు నిలిపివేయడంతో పెద్ద ప్రమాదం తప్పింది. తక్షణమే డ్రైవర్ను ఆస్పత్రికి తరలించారు. ఈ ఘటన బుధవారం మధ్యాహ్నం సోంపేటలో చోటుచేసుకుంది. పర్లాఖిముండి నుంచి బరంపురం వైపు 40 మంది ప్రయాణికులతో ఓ ప్రైవేట్ బస్సు బయలుదేరింది. బుధవారం మధ్యాహ్నం సోంపేట ఆర్టీసీ కాంప్లెక్స్ దగ్గరకు వస్తున్న సమయంలో బస్సు డ్రైవర్ సాయికి ఫిట్స్ వచ్చింది. తనకు కళ్లు తిరుగుతుండడంతో పాటు ఒంట్లో ఇబ్బంది ఉండడంతో వెంటనే బస్సును పక్కకు తిపి ఆపేశాడు. ఆ సమయంలో అక్కడే ఉన్న డ్రైవర్ యూనియన్ సభ్యులు దీనిని గమనించారు. వెంటనే స్పందించి డ్రైవర్ను పక్కనే ఉన్న ఆసుపత్రికి తరలించి చికిత్స అందజేశారు. డ్రైవర్ సమయస్ఫూర్తితో బస్సును పక్కకు ఆపడంతో పెద్ద గండం తప్పిందని ప్రయాణికులతోపాటు పట్టణ ప్రజలు ఊపిరిపీల్చుకున్నారు.