డీజీపీ కార్యాలయానికి కాశీబుగ్గ డీఎస్పీ

హైకోర్టు ఆదేశాలతో నాన్‌-ఫోకల్‌ పోస్టుకు బదిలీ

శ్రీకాకుళం, ఫిబ్రవరి 25(ఆంధ్రజ్యోతి): కాశీబుగ్గ డీఎస్పీ షేక్‌ షాబాజ్‌ అహ్మద్‌ బదిలీ అయ్యారు. ఆయనను తక్షణమే విధులు నుంచి రిలీవ్‌ చేసి, మంగళగిరిలోని రాష్ట్ర పోలీసు ప్రధాన కార్యాలయంలో రిపోర్ట్‌ చేయాలని రాష్ట్ర డైరెక్టర్‌ జనరల్‌ ఆఫ్‌ పోలీస్‌ (డీజీపీ) హరీష్‌కుమార్‌ గుప్తా ఆదేశించారు. ఈ మేరకు బుధవారం ఉత్తర్వులు జారీ చేశారు. పోలిపల్లి శ్రీకర్‌ తదితరులు దాఖలు చేసిన డబ్ల్యూఏ నెం.274/2024 కేసులో విచారణ చేసిన హైకోర్టు.. ఎంపికైన డైరెక్ట్‌ రిక్రూట్‌ అభ్యర్థులందరినీ తదుపరి ఉత్తర్వులు వెలువడే వరకు నాన్‌-ఫోకల్‌( ప్రాధాన్యత లేని) పోస్టుల్లో నియమించాలని ఈ నెల 11న రాష్ట్ర ప్రభుత్వాన్ని ఆదేశించింది. కోర్టు తీర్పు అమలులో భాగంగా బుధవారం సమావేశమైన పోలీస్‌ ఎస్టాబ్లిష్మెంట్‌ బోర్డ్‌(పీఈబీ) చేసిన సిఫారసుల మేరకు డీజీపీ ఈ నిర్ణయం తీసుకున్నారు. ఈ ఆదేశాల ప్రకారం కాశీబుగ్గ డీఎస్పీ షేక్‌ షాబాజ్‌ అహ్మద్‌ను మంగళగిరి హెడ్‌ క్వార్టర్స్‌కు అటాచ్‌ చేశారు. వెంటనే ఆయన స్థానంలో ప్రత్యామ్నాయ ఏర్పాట్లు చేసి, రిలీవ్‌ చేయాలని సంబంధిత యూనిట్‌ అధికారులకు డీజీపీ ఉత్తర్వుల్లో స్పష్టం చేశారు.