వంశధార కాలువ కబ్జా

జమ్ముజంక్షన్‌ వద్ద స్థలంపై అక్రమార్కుల కన్ను

నరసన్నపేట, ఆగస్టు 27(ఆంధ్రజ్యోతి): నరసన్నపేటలో ఆక్రమణలు పెరిగిపోతున్నాయి. ఖాళీ స్థలాలే కాదు కాలువలను సైతం అక్రమార్కులు వదలడం లేదు. నరసన్నపేట జాతీయ రహదారి పక్కనే.. జమ్ముజంక్షన్‌ వద్ద ఎన్బీసీ కాలువగట్టును చదును చేసి.. వంశధార స్థలం ఆక్రమణకు కొంతమంది యత్నిస్తున్నారు. సుమారు రూ.1.5 కోట్లు విలువైన ఈ స్థలంపై కబ్జాదారుల కన్ను పడింది. గురువారం యంత్రాలతో కాలువ గట్టు పక్కనే ఉన్న ప్రదేశాన్ని చదును చేశారు. అక్కడ దుకాణాలను క్రమేపీ తొలగించి.. ఈ స్థలాన్ని యూనియన్‌ భవనం పేరుతో ఆక్రమించేందుకు కొంతమంది ప్రయత్నాలు చేస్తున్నారు. ఈ స్థలం వెనుకభాగాన సుమారు 20సెంట్లు ప్రభుత్వ స్థలం ఇప్పటికే ఆక్రమణకు గురైంది. ఇప్పుడిప్పుడే వాణిజ్యపరంగా ఈ ప్రాంతం అభివృద్ధి చెందడంతో.. ఆక్రమణలు పెరిగిపోతున్నాయి. నరసన్నపేటలో ప్రభుత్వ భూములను పరిరక్షించడంలో విఫలం చెందారని విజిలెన్స్‌ అండ్‌ ఎన్‌ఫోర్స్‌మెంట్‌ అధికారులు సిఫార్సుల మేరకు ఈనెల 5న ఏడుగురు తహసీల్దార్లు, 12 మంది వీఆర్వోలపై క్రమశిక్షణ చర్యలకు ఉపక్రమించారు. ఈ నేపఽథ్యంలో జమ్ము రోడ్డులో ఆక్రమణలు మళ్లీ తెరపైకి రావడం గమనార్హం. ఇటీవల రెవెన్యూ అధికారులు ఈ ప్రాంతాన్ని పరిశీలించిన తర్వాత కూడా ఆక్రమణలకు యత్నించడం చర్చనీయాంశమవుతోంది. ఈ విషయమై నరసన్నపేటలోని వంశధార ఈఈ మురళీమోహనరావు వద్ద ప్రస్తావించగా.. వంశధార స్థలాలను ఆక్రమించేవారిపై చట్టపరంగా చర్యలు తీసుకుంటామని తెలిపారు. ఎటువంటి నిర్మాణాలు చేపట్టినా తొలగిస్తామన్నారు.