రెండెకరాలు.. 66 ఏళ్లు

లీజు ప్రాతిపదికన టీడీపీ కార్యాలయానికి భూమి కేటాయింపు

ఒంగోలు కలెక్టరేట్‌, మే 18 (ఆంధ్రజ్యోతి) : ఒంగోలులో తెలుగుదేశం పార్టీ కార్యాలయానికి రెండు ఎకరాల భూమిని 66 ఏళ్లపాటు లీజుకు కేటాయిస్తూ ప్రభుత్వం సోమవారం ఉత్తర్వులు జారీచేసింది. ఈమేరకు ప్రభుత్వ ప్రధాన కార్యదర్శి సాయిప్రసాద్‌ ఉత్తర్వులు జారీచేశారు. ఒంగోలులోని కొత్తమామిడిపాలెం గ్రామ సర్వే నెంబరులోని 82/1బీ, 2బీలో రెండు ఎకరాల భూమిని టీడీపీ ఆఫీసుకు కేటాయిస్తూ ఇటీవల జరిగిన మంత్రివర్గ సమావేశంలో తీర్మానించారు. ఆ సమావేశంలో 33 ఏళ్లకు లీజుగా ప్రతిపాదించగా దానిని 66 ఏళ్లకు పెంచి ఏడాదికి ఎకరాకు రూ.వెయ్యి లీజు చెల్లించే విధంగా ప్రభుత్వం తాజాగా ఉత్తర్వులు జారీచేసింది. టీడీపీ కార్యాలయానికి కేటాయించిన భూమిలో ఇప్పటికే నిర్మాణ పనులు ప్రారంభమయ్యాయి.