ఆలూరులో మరో సోలార్ పవర్ ప్రాజెక్టు
ABN , Publish Date - Apr 10 , 2026 | 10:57 PM
ఆలూరు నియోజకవర్గంలో మరో సోలార్ పవర్ ప్రాజెక్టు రానుంది.
360 మెగా వాట్స్ ఉత్పత్తి చేయనున్న ఎస్సార్ రెన్యూవబుల్స్ హైబ్రిడ్ వన్ లిమిటెడ్
ఎకరాకు రూ.31 వేలు లీజు
మంత్రివర్గం ఆమోదం
కర్నూలు, ఏప్రిల్ 10 (ఆంధ్రజ్యోతి): ఆలూరు నియోజకవర్గంలో మరో సోలార్ పవర్ ప్రాజెక్టు రానుంది. ఎస్సార్ రెన్యూవబుల్స్ హైబ్రిడ్ వన్ లిమిటెడ్ సంస్థ ఆలూరు, హత్తిబెళగల్, పెద్దహోతూరు గ్రామాల సరిసరాల్లో 360 మెగావాట్స్ సోలార్ పవర్ ఉత్పత్తికి సన్నాహాలు చేస్తోది. ఆ సంస్థకు అవసరమైన ప్రభుత్వ, ఇప్పటికే కేటాయించిన భూములకు ఏడాదికి ఎకరాకు రూ.31 వేలు లీజు చెల్లించేందుకు శుక్రవారం సీఎం చంద్రబాబు అధ్యక్షతన జరిగిన మంత్రివర్గ సమావేశం ఆమోదం తెలిపింది. రెండేళ్లకు ఒకసారి లీజు మొత్తం 5 శాతం పెంచేలా నిర్ణయించారు. సోలార్ పవర్ ప్రాజెక్టు కోసం ఇప్పటికే ఇప్పటికే ఎస్సార్ సంస్థ రైతుల నుంచి ప్రైవేటు భూములు సేకరిస్తోంది. ఆ భూముల మధ్యలో ఉన్న ప్రభుత్వ భూములు, ఇతరులకు కేటాయించిన భూములను లీజుకు కేటాయించాలని ఆ సంస్థ అభ్యర్థించింది. ఏపీ ఇంటిగ్రేటెడ్ క్లీన్ ఎనర్జీ పాలసీ-2024 నిబంధనల మేరకు మంత్రివర్గం లీజుకు కేటాయిస్తూ నిర్ణయం తీసుకుంది. ఇప్పటికే ఆలూరు నియోజకవర్గంలో ఆలూరు, ఆస్పరి, దేవనకొండ, చిప్పగిరి మండలాల్లో సోలార్, విండ్ పవర్ ప్రాజెక్టులు ఏర్పాటు చేశారు. వీటి ద్వారా స్థానికులకు ఉపాధి, ఉద్యోగాలు లభిస్తున్నాయి.
