గొడ్డలి పార్టీ దుష్ప్రచారాన్ని ఎట్టి పరిస్థితుల్లోనూ ఊపేక్షించొద్దు: సీఎం చంద్రబాబు

అమరావతి, సెప్టెంబర్ 8 (ఆంధ్రజ్యోతి): గొడ్డలి పార్టీ చేస్తున్న దుష్ప్రచారాన్ని ఎట్టి పరిస్థితుల్లోనూ ఊపేక్షించవద్దని ఆంధ్రప్రదేశ్ ముఖ్యమంత్రి, తెలుగుదేశం పార్టీ జాతీయ అధ్యక్షుడు నారా చంద్రబాబు నాయుడు (AP CM Chandrababu Naidu) స్పష్టం చేశారు. ఈరోజు (మంగళవారం) మంగళగిరిలోని టీడీపీ కేంద్ర కార్యాలయంలో లీడర్‌షిప్ కాంక్లేవ్‌లో ప్రజల్లో పాజిటివ్ ప్రచారం, వైసీపీ దుష్ప్రచారాన్ని తిప్పికొట్టే అంశంపై టీడీపీ నేతలకు.. సీఎం చంద్రబాబు దిశానిర్దేశం చేశారు. ఏపీలో చేసిన అభివృద్ధి - సంక్షేమం గురించి చెప్పుకోవాలని... వైసీపీ దుష్ప్రచారాన్ని తిప్పికొట్టాలని నిర్దేశించారు. ఫేక్ ప్రచారంతో వైసీపీ చేస్తున్న కుట్రలను సమర్థంగా ఫ్యాక్ట్‌తో తిప్పికొట్టాలని దిశానిర్దేశం చేశారు. అభివృద్ధి - సంక్షేమంలో సోషల్ మీడియా సహా వివిధ మార్గాల్లో అందరినీ భాగస్వామ్యం చేయాలని సూచించారు. వివిధ వర్గాలకు మేలు చేసేలా అమలు చేస్తోన్న ప్రభుత్వ కార్యక్రమాలను ప్రమోట్ చేయాలని ఆదేశించారు. పర్యాటక, ఆధ్యాత్మిక ప్రాంతాలకు సోషల్ మీడియాలో విస్తృత ప్రచారం కల్పించేలా చర్యలు చేపట్టాలని మార్గనిర్దేశం చేశారు.

టీమ్ స్పిరిట్‌తో కౌంటర్లు ఇవ్వాలి..

సీఎం రిలీఫ్ ఫండ్ సహా పెద్దఎత్తున సంక్షేమం అమలు చేస్తున్నామని.. దీన్ని ప్రజల్లోకి తీసుకెళ్లాలని సీఎం చంద్రబాబు సూచించారు. టీడీపీని, కూటమికి చెందిన వారిని ప్రత్యర్థులు విమర్శిస్తే.. వాటికి టీమ్ స్పిరిట్‌తో కౌంటర్లు ఇవ్వాలని ఆదేశించారు. నియోజకవర్గ స్థాయిలో జగన్ అండ్ కో విమర్శలు చేస్తే వాటిని వెంటనే తిప్పికొట్టాలని సూచించారు. ప్రత్యర్థులు చేసే దుష్ప్రచారాన్ని తిప్పికొట్టడాన్ని అందరూ బాధ్యతగా తీసుకోవాలని ఆదేశించారు. ఫేక్ ప్రచారం మీదే ఆధారపడి గొడ్డలి పార్టీ రాజకీయం చేస్తోందని ధ్వజమెత్తారు. తమ ప్రభుత్వంపై బురద వేసి... తప్పుడు ప్రచారం చేసి ప్రజలను మభ్యపెట్టేలా వైసీపీ వ్యవహరిస్తోందని ఆగ్రహించారు. ప్రజలకు వాస్తవాలు వివరించడంతోపాటు.. దుష్ప్రచారాన్ని తిప్పికొట్టడం కూడా రాజకీయాల్లో ముఖ్యమని సీఎం స్పష్టం చేశారు.

అక్రమాలపై గొడ్డలి పార్టీ ఎందుకు మాట్లాడదు..

లిక్కర్ స్కాం, వివేకా హత్య, ఏపీపీఎస్సీ అక్రమాలపై గొడ్డలి పార్టీ ఎందుకు మాట్లాడదని సీఎం చంద్రబాబు ప్రశ్నించారు. డీఎస్సీపై కుట్రపూరితంగా వైసీపీ దుష్ప్రచారం చేస్తోందని దుయ్యబట్టారు. కుప్పం వెళ్లి టీచర్లను బెదిరించే స్థాయికి గొడ్డలి పార్టీకి చెందిన మీడియా దారుణాలకు ఒడిగట్టిందని విమర్శించారు. ఈ స్థాయిలో దుష్ప్రచారానికి బరితెగించే వారిని ఎట్టి పరిస్థితుల్లోనూ ఊపేక్షించకూడదని స్పష్టం చేశారు. మై టీడీపీ యాప్‌ను పూర్తి స్థాయిలో వినియోచాలని సూచించారు. రాబోయే కాలంలో సోషల్ మీడియా చాలా కీలక పాత్ర పోషించబోతోందని తెలిపారు. పాత పద్ధతుల్లోనే రాజకీయం చేస్తామంటే.. టీడీపీ నేతలు వేగం అందుకోలేరని సీఎం పేర్కొన్నారు.

అన్ని నియోజకవర్గాలూ బెస్ట్ ప్రాక్టీసెస్‌ను అమలు చేయాలి..

అలాగే, ప్రజలకు ప్రభుత్వ, పాలనా సేవల అంశంపై లీడర్‌షిప్ కాన్‌క్లేవ్‌లో సీఎం చంద్రబాబు.. టీడీపీ నేతలకు దిశానిర్దేశం చేశారు. పౌర సేవలు అందించడంలో కొన్ని నియోజకవర్గాలు మంచి ఫలితాలను సాధిస్తున్నాయని సీఎం చంద్రబాబు తెలిపారు. అన్ని నియోజకవర్గాలూ బెస్ట్ ప్రాక్టీసెస్‌ను అమలు చేయాలని మార్గనిర్దేశం చేశారు.

ఎక్కడైనా అవకతవకలు జరిగితే కఠినంగా ఉంటాం..

ఏడాదికి రూ.1000 కోట్ల ఆదాయం వస్తున్నా వదులుకుని ప్రజలకు ఉచిత ఇసుక ఇస్తున్నామని సీఎం చంద్రబాబు స్పష్టం చేశారు. ఎక్కడైనా ఉచిత ఇసుక ఇతర రాష్ట్రాలకు వెళ్తే అడ్డుకోవాలని.. ఏ రీచ్ వద్ద ఎలాంటి పరిస్థితి ఉందో తెలిసిపోతోందని అన్నారు. వైసీపీ హయాంలో మద్యం విధానాన్ని అస్తవ్యస్తం చేసి నకిలీ, జే బ్రాండ్లు విక్రయించారని.. దీంతో 30 వేలమంది ప్రాణాలు విడిచారని చెప్పుకొచ్చారు. ఇప్పుడు వాటన్నిటినీ నియంత్రించి విక్రయాలను పారదర్శకంగా చేస్తున్నామని అన్నారు. మద్యం టెండర్ల గడువు ముగియబోతోందని... అయినా ప్రస్తుతం ఎన్ని దుకాణాలు ఉన్నాయో వాటిని రెన్యువల్ చేస్తామని వివరించారు. అయితే ఎమ్మార్పీ కంటే ఒక్క రూపాయి అదనంగా విక్రయించేందుకు వీల్లేదని స్పష్టం చేశారు. ఎక్కడైనా అవకతవకలు జరిగితే కఠినంగా ఉంటామని అన్నారు. ఆయా నియోజకవర్గాల్లో దీనిని సెట్ రైట్ చేసుకునే బాధ్యత ఎమ్మెల్యేలదేనని ముఖ్యమంత్రి ఆదేశించారు.

పబ్లిక్ గ్రీవెన్స్‌లను పూర్తిస్థాయిలో పరిష్కరించాలి..

వాట్సాప్ గవర్నెన్స్ ద్వారా సర్వీసులను ఆన్‌లైన్‌లోనే అందిస్తున్నామని సీఎం చంద్రబాబు వ్యాఖ్యానించారు. ‘పట్టాదారు పాస్ పుస్తకాలను క్యూఆర్ కోడ్, బ్లాక్ చెయిన్ టెక్నాలజీ ద్వారా భద్రతా ఫీచర్లతో ఇస్తున్నాం. ఆయా నియోజకవర్గాల్లో దీర్ఘాకాలిక సమస్యలను సుమోటోగా తీసుకుని పరిష్కరించాలి. తద్వారా మీకూ బ్రాండ్ వస్తుంది. సమస్య కూడా పరిష్కారం అవుతుంది. నివాసం ఉంటూ అభ్యంతరాల్లేని చోట ఇళ్ల పట్టాలు అందించి క్రమబద్ధీకరిస్తాం. ఓ రాజకీయ నాయకుడు ఎన్నిసార్లు వీలైతే అన్నిసార్లు ప్రజలకు దగ్గరవ్వాలి. కనీసం వాయిస్ మెసేజ్ ద్వారా ఆయినా ప్రజలకు చేరువ కావాలి. ప్రజల సమస్యలపై మానవత్వంతో స్పందిస్తే వారిలో సానూకూల దృక్పథం వచ్చే అవకాశం ఉంది. ఆర్టీజీఎస్ ద్వారా పబ్లిక్ గ్రీవెన్స్‌లను పూర్తిస్థాయిలో పరిష్కరించేలా చూడాలి. క్షేత్రస్థాయి నుంచి రాష్ట్రస్థాయి వరకూ వీటి పరిష్కారానికి పనిచేయాలి’ అని సీఎం చంద్రబాబు మార్గనిర్దేశం చేశారు.

డిజిటల్ హెల్త్ రికార్డులు తయారు చేస్తున్నాం..

ప్రజల నుంచి వస్తున్న ఫిర్యాదుల్లో అధికభాగం భూ వివాదాలే ఉంటున్నాయని సీఎం చంద్రబాబు వ్యాఖ్యానించారు. ‘సంజీవని ప్రాజెక్టు ద్వారా రాష్ట్రవ్యాప్తంగా డిజిటల్ హెల్త్ రికార్డులు తయారు చేస్తున్నాం. గడిచిన మూడేళ్లుగా రాష్ట్రంలో విద్యుత్ ఛార్జీలు పెంచలేదు. రూఫ్ టాప్ సోలార్‌పై అంతా దృష్టిపెట్టాలి. ల్యాండ్ రికార్డులు అన్నీ 2027 మార్చినాటికి ప్రక్షాళన పూర్తి అయితే భూ వివాదాలు పరిష్కారమవుతాయి. నెలలో కనీసం నాలుగు సార్లు పేదల సేవలో కార్యక్రమంతో ప్రజలను తాము కలుస్తున్నాం. జెన్ జీ యువత ఆలోచనలను కూడా పరిగణనలోకి తీసుకుని నిర్ణయాలు తీసుకోవాలి. రియల్ టైమ్ నిర్ణయాలతో దూకుడుగా జెన్ జీ వర్గం ఉంది. ఎలాంటి ఎకానమీ ఉండాలనేది ప్రజలే నిర్ణయించేలా ఆలోచనలు చేయాలి. పదేళ్ల తర్వాత ఎలాంటి పరిస్థితులు, సవాళ్లు ఉంటాయనే విషయాన్ని అలోచించాలి. హెల్త్, ఎడ్యుకేషన్, లివబిలిటీ లాంటి అంశాలు జీవన ప్రమాణాలు పెంచడానికి అవసరం. గత సమావేశంలో నియోజకవర్గాల్లో పరిష్కరించాల్సిన అంశాలను ఎమ్మెల్యేలు లేవనెత్తారు. వీటిపై సమీక్షించి 175 నియోజకవర్గాల్లో రూ.20,400 కోట్ల విలువైన 616 పనులను మంజూరు చేశాం’ అని సీఎం చంద్రబాబు పేర్కొన్నారు.

ఈ వార్తలు కూడా చదవండి..

సమర్థ నాయకత్వంతోనే సమస్యల పరిష్కారం: సీఎం చంద్రబాబు

గ్రామీణాభివృద్ధి, మహిళా సాధికారతకు స్వర్ణభారత్ ట్రస్ట్ కృషి అమోఘం: యోగి ఆదిత్యానాథ్

పార్టీ అప్పగించిన పనులను తప్పనిసరిగా పూర్తి చేయాల్సిందే: మంత్రి లోకేశ్

Read Latest AP News And Telangana News And National News

And Telugu News