ప్రధాని పర్యటన ఏర్పాట్లపై ఐబీ సమీక్ష

వసతి, రవాణా, భద్రతపై అధికారులతో సమీక్ష

తిరుపతి(నేరవిభాగం), అక్టోబరు 19(ఆంధ్రజ్యోతి): అఖిల భారత డీజీపీల సదస్సు నేపథ్యంలో ప్రధాని నరేంద్ర మోదీ పర్యటన ఏర్పాట్లపై కేంద్ర నిఘా వర్గాలు ప్రత్యేక దృష్టి సారించాయి. డిసెంబరు 4 నుంచి 6వ తేదీ వరకు ఏర్పేడు సమీపంలోని ఐసర్‌లో జరుగనున్న ఈ సదస్సుకు ప్రధాని మోదీతోపాటు కేంద్ర హోంమంత్రి అమిత్‌షా, జాతీయ భద్రతా సలహాదారు అజిత్‌దోవల్‌ తదితర ప్రముఖులు, వివిధ రాష్ట్రాల డీజీపీలు, 400 మంది ఐపీఎస్‌ అధికారులు హాజరుకానున్నారు. ఈ నేపథ్యంలో కేంద్ర ఇంటెలిజెన్స్‌ బ్యూరో అధికారులు సోమవారం తిరుపతి కలెక్టరేట్‌లో జిల్లా ఉన్నతాధికారులతో సమావేశమయ్యారు. కలెక్టర్‌ వెంకటేశ్వర్‌, ఎస్పీ సుబ్బరాయుడుతోపాటు వివిధ శాఖల ఉన్నతాధికారులు ఈ సమావేశంలో పాల్గొన్నారు. ప్రముఖుల పర్యటన నేపథ్యంలో వసతి, రవాణా, భద్రతా ఏర్పాట్లు, వివిధ శాఖల మధ్య సమన్వయం వంటి అంశాలపై చర్చించి ఏర్పాట్లను సమీక్షించినట్లు తెలిసింది. సదస్సు నిర్వహణకు అవసరమైన ఏర్పాట్లను సమన్వయంతో చేపట్టడంపై అధికారులు దృష్టి సారించారు.