పోడు రైతులకు.. ఇందిర సౌర గిరి జల వికాసం

• 18న అమ్రాబాద్‌లో ప్రారంభించనున్న సీఎం రేవంత్‌

పోడు రైతులకు రాష్ట్ర ప్రభుత్వం తీపి కబురు చెప్పింది. రాష్ట్రంలో పోడు పట్టాలు పొందిన 2.10 లక్షల మంది రైతులకు చెందిన 6 లక్షల ఎకరాలకు ‘ఇందిర సౌర గిరి జల వికాసం’ పథకం అమలు చేయనుంది. ఈ పథకం కోసం వచ్చే ఐదేళ్లలో(2025-26 నుంచి 2029-30) రూ.12,600 కోట్లను ఖర్చు చేయాలని నిర్ణయించింది. ప్రస్తుత సంవత్సరం(2025-26)లో రూ.600 కోట్ల ను ఖర్చు చేయనుండగా, తదుపరి నాలుగేళ్ల పాటు ఏడాదికి రూ.3వేల కోట్ల చొప్పున ఖర్చు చేయనున్నారు. పథకం అమలుకు ఎస్టీ ఎస్డీఎఫ్‌ నిధులను వినియోగించనున్నారు.

ఈ మేరకు ఈ పథకం అమలుకు అనుమతులిస్తూ గురువారం ప్రభుత్వం ఉత్తర్వులు(జీవో-15) జారీ చేసింది. ఈ పథకం కింద పోడు పట్టాలు పొందిన భూముల్లో బోర్లు వేయడం, వాటికి సోలార్‌ పంపు సెట్లు అందించడం సహా మౌలిక సౌకర్యాలను కల్పిస్తారు. 100ు రాయితీతో ఈ పథకాన్ని గిరిజనులకు అందించనున్నారు. డిప్యూటీ సీఎం భట్టి విక్రమార్కతో కలిసి సీఎం రేవంత్‌రెడ్డి ఈ నెల 18న అచ్చంపేట నియోజకవర్గంలోని అమ్రాబాద్‌ మండలం మాచారంలో పథకాన్ని ప్రారంభించనున్నారు.