Jagga Reddy: జగ్గారెడ్డి... ఎ వార్‌ ఆఫ్‌ లవ్‌!
ABN , Publish Date - Mar 11 , 2025 | 04:16 AM
రాజకీయ రంగంలో రాణించిన తూర్పు జగ్గారెడ్డి.. సినీ రంగంలోనూ ఆరంగేట్రం చేస్తున్నారు. ‘జగ్గారెడ్డి.. ఎ వార్‌ ఆఫ్‌ లవ్‌’ అనే సినిమాలో.. తన నిజ జీవిత పాత్రనే పోషించనున్నారు. జగ్గారెడ్డి తొలి సినిమానే పాన్‌ ఇండియా రేంజ్‌లో నిర్మాణం కాబోతోంది.
పాన్‌ ఇండియా స్థాయిలో సినిమా నిర్మాణం
అందులో నా నిజ జీవిత పాత్రనే పోషిస్తున్నా
వచ్చే ఏడాది ఉగాదికి సినిమా విడుదల: తూర్పు జగ్గారెడ్డి
హైదరాబాద్‌, మార్చి 10 (ఆంధ్రజ్యోతి): రాజకీయ రంగంలో రాణించిన తూర్పు జగ్గారెడ్డి.. సినీ రంగంలోనూ ఆరంగేట్రం చేస్తున్నారు. ‘జగ్గారెడ్డి.. ఎ వార్‌ ఆఫ్‌ లవ్‌’ అనే సినిమాలో.. తన నిజ జీవిత పాత్రనే పోషించనున్నారు. జగ్గారెడ్డి తొలి సినిమానే పాన్‌ ఇండియా రేంజ్‌లో నిర్మాణం కాబోతోంది. తెలుగు, హిందీ భాషల్లో రూపొందనున్న సినిమాకు సంబంధించి కథను ఈ ఉగాది పర్వదినం రోజున వింటానని, వచ్చే ఏడాది ఉగాది కల్లా సినిమాను పూర్తి చేసి విడుదల చేస్తామని చెప్పారు. ఈ మేరకు సోమవారం ‘ఆంధ్రజ్యోతి’కి ఆయన వివరాలను వెల్లడించారు.
ఈ సినిమాను ప్రేమకథగా తీస్తున్నామని, ఆ కథలో ఒక ప్రత్యేక పాత్రను తాను పోషించనున్నానని తెలిపారు. సినిమాలోని ఈ పాత్ర.. నిజ జీవితంలో తన క్యారెక్టర్‌కు అద్దం పట్టనుందన్నారు. సీఎం రేవంత్‌రెడ్డి, టీపీసీసీ చీఫ్‌ మహేశ్‌గౌడ్‌ అనుమతితోనే సినిమాలో నటిస్తానని చెప్పారు. ఓ వ్యక్తి కలిసి తన ఒరిజినల్‌ క్యారెక్టర్‌కు తగ్గట్టుగా ఈ సినిమా ఉంటుందని చెప్పారని, ఆ పాత్రలో తానే నటించాలని కోరారని వెల్లడించారు. మధ్యలో విరామానికి ముందు మొదలయ్యే తన పాత్ర.. సినిమా చివరి దాకా ఉంటుందన్నారు.
