నోటిఫికేషన్‌ రావడమే ఆలస్యం..!

- స్థానిక సంస్థల్లో అతివలే కీలకం

- పరిషత్‌, పంచాయతీల్లో 11,787 మంది మహిళా ఓటర్లు అధికం

- జిల్లాలో తుది గ్రామీణ ఓటర్లు 3.53 లక్షల మంది

- 12 జడ్పీటీసీ, 123 ఎంపీటీసీ స్థానాలు.. 260 సర్పంచ్‌, 2268 వార్డుసభ్యుల స్థానాలు

(ఆంధ్రజ్యోతి సిరిసిల్ల)

స్థానిక సంస్థల ఎన్నికలకు అధికార యంత్రాంగం సర్వం సిద్ధం చేసింది. ఈనెల 2న గ్రామ పంచాయతీల తుది ఓటరు జాబితాను గ్రామా యూనిట్‌ వార్డుల వారిగా ప్రకటించారు. తాజాగా బుధవారం రాజన్న సిరిసిల్ల జిల్లాలోని జడ్పీటీసీ, ఎంపీటీసీ స్థానాలకు సంబంధించిన తుది ఓటరు జాబితాను వెల్లడించారు. జిల్లాలో 3.53 లక్షల మంది ఓటర్లు ఉన్నట్లు లెక్క తేల్చారు. జిల్లాలో పరిషత్‌, గ్రామపంచాయతీ ఎన్నికలకు సంబంధించిన కీలకమైన ఓటరు జాబితాలతోపాటు పోలింగ్‌ కేంద్రాలు, ఇతర సామగ్రిని కూడా అధికారులు సిద్ధం చేశారు. ఎన్నికల నోటిఫికేషన్‌ రావడమే తరువాయి అన్నట్లుగా జిల్లా యంత్రాంగం ఎన్నికల నిర్వహణకు రెడీగా ఉంది. నోటిఫికేషన్‌ త్వరలో వస్తుందనే ఉత్కంఠ ఏర్పడింది.

ఫ మహిళా ఓటర్లే అధికం

రాజన్న సిరిసిల్ల జిల్లాలో గ్రామపంచాయతీ, జిల్లా, మండల ప్రాదేశిక నియోజకవర్గాల ఓటరు జాబితాలను వేరువేరుగా ప్రకటించిన తుది ఓటరు జాబితాల ప్రకారం గ్రామీణ ఓటర్లలో మహిళా ఓటర్లే అధికంగా ఉన్నారు. స్థానిక సంస్థల ఎన్నికలు ఎప్పుడు నిర్వహించిన మహిళా ఓట్లే కీలకం కానున్నాయి. జిల్లాలో జడ్పీటీసీలు, 123 ఎంపీటీసీ స్థానాలు ఉన్నాయి. 260 గ్రామ సర్పంచులు, 2268 వార్డు సభ్యుల స్థానాలు ఉన్నాయి. వీటి పరిధిలో జిల్లా గ్రామీణ ఓటర్లు 3 లక్షల 53 వేల 351 మంది ఉన్నారు. ఇందులో పురుషులు 170772 మంది, మహిళలు 182559 మంది ఉన్నారు. ఇందులో పురుషుల కంటే మహిళా ఓటర్లు 11787 మంది అధికంగా ఉన్నారు. జిల్లాలోని ప్రతి మండలంలో మహిళలు ఓట్లు అధికంగా ఉండడంతో స్థానిక ఎన్నికల్లో గెలుపు, ఓటములపై మహిళా ఓటింగ్‌ ప్రభావం చూపనున్నట్లు భావిస్తున్నారు.

ఫ స్థానిక సంస్థలకు ప్రత్యేక పాలన

జిల్లాలో 260 గ్రామపంచాయతీలు ఉన్నాయి. గ్రామపంచాయతీలో పాలకవర్గం గడువు గత సంవత్సరం 31 జనవరితో ముగిసిపోయింది. ఫిబ్రవరి నుంచి ప్రత్యేక అధికారుల పాలన మొదలైంది. దాదాపు 20 నెలలుగా ప్రత్యేక పాలన కొనసాగుతోంది. జిల్లా పరిషత్‌, మండల పరిషత్‌ పాలకవర్గాల గడువు జూలై 3వ తేదీన ముగిసింది. నోటిఫికేషన్‌ లేకుండానే 14 నెలలు గడిచిపోయింది.

ఫ పోలింగ్‌ కేంద్రాలు.. సామగ్రి సిద్ధం

జిల్లా యంత్రాంగం స్థానిక సంస్థల ఎన్నికల నిర్వహణకు కావాల్సిన అన్ని ఏర్పాట్లు చేశారు. పోలింగ్‌ కేంద్రాలు, అవసరమయ్యే బ్యాలెట్‌ బాక్సులు, ఇతర సామగ్రిని సిద్ధంగా ఉంచారు. జిల్లాలో పరిషత్‌ ఎన్నికలకు సంబంధించి 12 జడ్పీటీసీలు, 123 ఎంపీటీసీ స్థానాలకు సంబంధించి 712 పోలింగ్‌ కేంద్రాలను ఏర్పాటు చేయనున్నారు. జిల్లాలో 260 గ్రామపంచాయతీలు, 2268 వార్డు సభ్యులు ఉండగా 1734 పోలింగ్‌ కేంద్రాలు సిద్ధం చేశారు. గ్రామ పంచాయతీ ఎన్నికలకు సంబందించి 200 మంది ఓటర్లు ఉన్నవరకు 1734 పోలింగ్‌ కేంద్రాలు, 400 ఓటర్ల వరకు 468 పోలింగ్‌ కేంద్రాలు, 650 ఓటర్ల వరకు ఉన్న పంచాయతీల్లో 76 పోలింగ్‌ కేంద్రాలను ఏర్పాటు చేశారు. పంచాయతీ ఎన్నికల్లో 650 మంది ఓటర్లకు ఒక పోలింగ్‌ కేంద్రాన్ని సిద్ధం చేస్తున్నారు. అంతకుమించి ఓటర్లు ఉంటే రెండవ పోలింగ్‌ కేంద్రం ఏర్పాటు చేస్తారు. 200 మంది ఓటర్లు ఉన్న చోట ఒక ప్రిసైడింగ్‌ అధికారి ఒక పోలింగ్‌ అధికారి ఉంటారు. 201 నుంచి 400 వరకు ఒక ప్రిసైడింగ్‌ అధికారి ఇద్దరు పోలింగ్‌ అధికారులు, 401 నుంచి 650 వరకు ఉంటే ప్రిసైడింగ్‌ అధికారితో పాటు ముగ్గురు పోలింగ్‌ అధికారులను నియమిస్తారు. గ్రామాల్లో వార్డుల వారీగా ఓటరు జాబితాలను రూపొందించే క్రమంలో ఒకే కుటుంబంలోని ఓటర్లందరూ ఒకే పోలింగ్‌ స్టేషన్‌ పరిధిలో ఉండే విధంగా సవరించారు. మృతిచెందిన ఓటర్ల పేర్లను జాబితాల నుంచి తొలగించారు. కొత్త ఓటర్లను జాబితాలో చేర్చారు.

పరిషత్‌ తుది ఓటరు జాబితా

జడ్పీటీసీ ఎంపీటీసీలు పురుషులు మహిళలు మొత్తం

బోయిన్‌పల్లి 11 14753 1572 30505

చందుర్తి 10 13445 14649 28094

ఇల్లంతకుంట 14 19644 20902 40546

గంభీరావుపేట 13 17811 18996 36807

కోనరావుపేట 12 17180 18045 35225

ముస్తాబాద్‌ 13 18658 19842 38500

రుద్రంగి 05 6454 7208 13665

తంగళ్లపల్లి 14 19395 20683 40079

వీర్నపల్లి 05 5769 5958 11727

వేములవాడ 06 8953 9523 18492

వేములవాడరూరల్‌ 07 9020 9805 18825

ఎల్లారెడ్డిపేట 13 19690 21196 40886

మొత్తం 123 170772 182559 353351