Rangareddy: అద్దె కట్టలేదని ప్రభుత్వ మెడికల్‌ కాలేజీకి తాళం

• గంటన్నర పాటు ఆరుబయటే ఉన్న విద్యార్థులు, ఫ్యాకల్టీ

• కలెక్టర్‌, ఆర్డీవో జోక్యంతో తాళాలు తీసిన భవన యజమాని

ఆదిభట్ల, ఏప్రిల్‌ 28 (ఆంధ్రజ్యోతి): అద్దె కట్టలేదని ప్రభుత్వ మెడకల్‌ కళాశాలకు భవన యాజమాన్యం తాళం వేసింది. దీనితో వైద్య విద్యార్థులు, అధ్యాపకులు ఇబ్బందిపడ్డారు. కలెక్టర్‌, ఆర్డీవో జోక్యంతో తాళాలు తీశారు. రంగారెడ్డి జిల్లా ఇబ్రహీంపట్నం మండలం మంగల్‌పల్లిలో మహేశ్వరం ప్రభుత్వ వైద్య కళాశాల వద్ద ఈ సన్నివేశం చోటు చేసుకుంది. మంగల్‌పల్లి సమీపంలోని భారత్‌ ఇంజనీరింగ్‌ కాలేజీలోని ఓ భవనాన్ని అద్దెకు తీసుకుని మహేశ్వరం ప్రభుత్వ వైద్య కళాశాలను నిర్వహిస్తున్నారు. దీనికి గతేడాది ఆగస్టు నుంచి నెలకు రూ.16 లక్షల చొప్పున అద్దె చెల్లించాలి.

8 నెలల అద్దె రావాల్సి ఉందంటూ ఇంజనీరింగ్‌ కాలేజీ యాజమాన్యం.. వైద్య కళాశాల తరగతి గదులకు తాళాలు వేశారు. వైద్య కళాశాల బోర్డునూ తొలగించారు. దీనితో మంగళవారం ఉదయం కళాశాలకు వచ్చిన వైద్య విద్యార్థులు, ఫ్యాకల్టీ బయటే ఉండిపోయారు. ఈ విషయం కలెక్టర్‌ నారాయణరెడ్డి దృష్టికి వెళ్లడంతో.. సమస్యను పరిష్కరించాలని ఇబ్రహీంపట్నం ఆర్డీవో అనంతరెడ్డికి సూచించారు. ఆర్డీవో భవన యాజమాన్యంతో మాట్లాడారు. వారంలో అద్దె సమస్యను పరిష్కరిస్తామని హామీ ఇచ్చారు. దీనితో యాజమాన్యం తాళాలు తీయగా.. వైద్య కళాశాల తరగతులు కొనసాగాయి.