బాల్య వివాహాల నియంత్రణకు కృషి
ABN , Publish Date - Dec 04 , 2025 | 11:38 PM
జిల్లా వ్యాప్తంగా బాల్య వివాహాల నియంత్రణే లక్ష్యంగా బాల్య వివాహ ముక్త్ భారత్ వంద రోజుల ప్రత్యేక కార్యమ్రాన్ని విజయవంతంగా అమలుచేస్తున్నట్లు జిల్లా సంక్షేమాధికారి డాక్టర్ భాస్కర్ తెలిపారు.
- జిల్లా సంక్షేమాధికారి భాస్కర్
ఆసిఫాబాద్రూరల్, డిసెంబరు 4(ఆంధ్రజ్యోతి): జిల్లా వ్యాప్తంగా బాల్య వివాహాల నియంత్రణే లక్ష్యంగా బాల్య వివాహ ముక్త్ భారత్ వంద రోజుల ప్రత్యేక కార్యమ్రాన్ని విజయవంతంగా అమలుచేస్తున్నట్లు జిల్లా సంక్షేమాధికారి డాక్టర్ భాస్కర్ తెలిపారు. కార్యక్రమంలో భాగంగా జిల్లా మహిళా శిశు సంక్షేమ శాఖ, జిల్లా బాలల సంరక్షణ విభాగం, షూస్ స్వచ్ఛంద సంస్థ సౌజన్యంతో రూపొందించిన అవగాహన పోస్టర్లను గురువారం ఆవిష్కరించారు. ఈ సందర్భంగా భాస్కర్ మాట్లాడుతూ బాల్య వివాహం సమాజానికి మచ్చ వంటిదని ఇది బాలల శారీరక, మానసిక, విద్యా భవిష్యత్ను తీవ్రంగా దెబ్బతీస్తుందని పేర్కొన్నారు. బాల్య వివాహాల నిషేధ చట్టం ద్వారా ప్రభుత్వం కఠినమైన శిక్షలు విధిస్తోందన్నారు. ఈ విషయాన్ని ప్రజలకు చేరువ చేసేందుకే అవగాహన పోస్టర్లను జిల్లాలోని దేవాలయాలు, మసీదులు, చర్చి వంటి ప్రార్థన స్థలాల వద్ద ఏర్పాటు చేస్తున్నట్లు తెలిపారు. బాల్యవివాహాల నిషేధ చట్టం, ఫిర్యాదు చేసే విధానం, శిక్షల వివరాలపై ప్రజలకు స్పష్టమైన అవగాహన కలుగుతుందని అన్నారు. జిల్లా బాలల సంరక్షణాధికారి మహేష్ మాట్లాడుతూ షూస్ స్వచ్ఛంద సంస్థ సిబ్బంది, జిల్లా బాలల సంరక్షణ విభాగం సిబ్బంది సమన్వయంతో బాల్య వివాహాల నిర్మూలనకు అంకిత భావంతో పని చేస్తున్నారని తెలిపారు. గ్రామస్థాయి నుంచి జిల్లా స్థాయి వరకు నిరంతరం అవగాహన కార్యక్రమాలు నిర్వహిస్తున్నారు. బాలల హక్కుల పరిరక్షణలో కీలకపాత్ర పోషిస్తున్నారని వారి సేవలను కొనియా డారు. కార్యక్రమంలో బాల రక్ష భవన సిబ్బంది శ్రావణ్కుమార్, ప్రవీణ్కుమార్, నవీన్కుమార్, వెంకటేశ్వర్లు, షూస్ సంస్థ కో ఆర్డినేటర్ సంతోష్కుమార్, దేవాజీ, ప్రభు, సంతోష్, తదితరులు పాల్గొన్నారు.
