Voter List: అసోం ఓటరు జాబితా నుంచి 10.56 లక్షల పేర్ల తొలగింపు

గువాహతి, డిసెంబరు 27: ఆరు నెలల్లోగా అసోంలో అసెంబ్లీ ఎన్నికలు జరగనున్న నేపథ్యంలో చేపట్టిన ఓటర్ల జాబితా ప్రత్యేక సవరణ అనంతరం 10.56 లక్షల మంది ఓటర్ల పేర్లను తొలగించారు. మరణించడం, వేరే చోటుకు మారడం లేదా బహుళ ఎంట్రీలు ఇందుకు కారణం. శనివారం ఎన్నికల సంఘం సమీకృత ముసాయిదా ఓటరు జాబితాను విడుదల చేసింది. దీని ప్రకారం రాష్ట్రంలో 93,021 మంది అనుమానాస్పద ఓటర్లు (డీ-ఓటర్లు) కాకుండా మొత్తం 2,51,09,754 మంది ఓటర్లు ఉన్నారు. ఓటర్ల జాబితా ప్రత్యేక సవరణలో భాగంగా నవంబరు 22 నుంచి డిసెంబరు 20 వరకు ఇంటింటికీ వెళ్లి వెరిఫికేషన్‌ను పూర్తి చేసిన తర్వాత ముసాయిదా జాబితాను ప్రచురించారు. జనవరి 22 వరకు ఓటర్లు తమ ఫిర్యాదులు, అభ్యంతరాలను సమర్పించే అవకాశం కల్పించారు. ఫిబ్రవరి 10న తుది ఎన్నికల జాబితాను ప్రచురిస్తారు.