Donald Trump: ట్రంప్‌కు ఫిఫా శాంతి బహుమతి

• ప్రదానం చేసిన ప్రపంచ ఫుట్‌బాల్‌ సమాఖ్య

వాషింగ్టన్‌, డిసెంబరు 5: అమెరికా అధ్యక్షుడు ట్రంప్‌ అన్నట్టుగానే ‘శాంతి దూత’ అయ్యారు. 8యుద్ధాలు ఆపానంటూ ఆయన గట్టిగా కోరుకున్నట్టుగానే శాంతి బహుమతి వచ్చింది. కానీ నోబెల్‌ కాదు.. ఫిఫా శాంతి బహుమతి. ‘ప్రపంచ ఫుట్‌బాల్‌ సమాఖ్య’ తొలిసారిగా ప్రవేశపెట్టిన ఈ శాంతి బహుమతిని శుక్రవారం ట్రంప్‌కు ప్రదానం చేసింది. వచ్చే ఏడాది జరగనున్న ఫిఫా ప్రపంచ కప్‌ ఫుట్‌బాల్‌ టోర్నీకి జట్ల ఎంపికపై శుక్రవారం వాషింగ్టన్‌లో డ్రా వేడుక జరిగింది. ట్రంప్‌ ఈ కార్యక్రమంలో ముఖ్య అతిథిగా పాల్గొన్నారు. ఫిఫా అధ్యక్షుడు గియాని ఇన్‌ఫాంటినో ఈ సందర్భంగా ట్రంప్‌కు శాంతి బహుమతిని ప్రదానం చేశారు. బంగారు రంగులో ఉన్న పెద్ద ట్రోఫీని, నీలి రంగు రిబ్బన్‌తో కూడిన స్వర్ణ పతకాన్ని అందజేశారు. ‘నిజంగా ఇది నా జీవితంలో అత్యంత గొప్ప గౌరవం. భారత్‌-పాక్‌ యుద్ధం సహా ఎన్నో యుద్ధాలు ఆపి.. లక్షలాది ప్రాణాలు కాపాడను. నిజానికి నాకు బహుమతులు అవసరం లేదు. ప్రజల ప్రాణాలు కాపాడటమే లక్ష్యం’ అని ట్రంప్‌ పేర్కొన్నారు. ఫిఫా శాంతి బహుమతిని ఇవ్వడం ఇదే తొలిసారి కావడం గమనార్హం.