విశ్వకళ్యాణ సంక్రాంతి లక్ష్మి

విశ్వకళ్యాణ సంక్రాంతి లక్ష్మి

శ్రీమకర సంక్రమణ – ఉషఃశ్రీ కిరణ వి

రాజ తేజస్వి – సూర్యనారాయణుండు,

స్వర్ణరథమున విచ్చేయ – భవ్య పుష్య

కాంతులెసగ నేతెంచె – సంక్రాంతి లక్ష్మి!

పచ్చనైన గుమ్మాలన్ని – పచ్చమావి

తోరముల – రంగవల్లులతో కలకల

లాడ, గొబ్బెమ్మ – పూబంతు లలరగాను,

రమ్యగతి వచ్చె – స్వర్ణ సంక్రాంతి లక్ష్మి!

‘అన్నదాతా! శుభమస్తు!’ – అని – సిరిసం

పదల నొసగెడి – సౌభాగ్యలక్ష్మి!

‘జై జవాను!’ – యని – విజయాల నుగ్రహించు –

వీరదుర్గాంబ – శ్రీవిజయలక్ష్మి!

విద్యార్థుల – నఖిల విజ్ఞానులుగ తీర్చు –

విశ్వవిద్యా – మహావిభవలక్ష్మి!

సకల ప్రజల – దయాసాంద్రవై బ్రోచు –

అభయదాయిని! కరుణార్ద్రలక్ష్మి!

ధాన్యరాశులు – పూబంతిదండ లెల్ల –

పసిడికాంతుల రాజిల్లి – స్వాగతించ,

తెలుగు వెలుగులు – పుడమిని తేజరిల్ల –

రమ్ము – విశ్వకళ్యాణ సంక్రాంతి లక్ష్మి!

‘కళ్యాణశ్రీ’ జంథ్యాల వేంకటరామశాస్త్రి