Aviation: మేక్ ఇన్ ఇండియా’కు ఊతం.. కేంద్ర మంత్రి ఆధ్వర్యంలో భారీ ఒప్పందం

న్యూఢిల్లీ: మహీంద్రా గ్రూప్‌లో భాగమైన మహీంద్రా ఏరోస్ట్రక్చర్స్ ప్రైవేట్ లిమిటెడ్ (MASPL) సంస్థ, ఎయిర్‌బస్ హెలికాప్టర్స్ నుంచి H130 లైట్ సింగిల్-ఇంజిన్ హెలికాప్టర్ యొక్క ప్రధాన ఫ్యూజ్‌లేజ్ తయారీ బాధ్యతను సొంతం చేసుకుంది. ఈ ఒప్పందం భారతదేశ ‘మేక్ ఇన్ ఇండియా’ కార్యక్రమానికి ఒక విజయంగా చెప్పవచ్చు. ఈ భాగస్వామ్యం ప్రపంచ ఏరోస్పేస్ రంగంలో మహీంద్రా స్థానాన్ని మరింత పటిష్ఠం చేస్తుందని సంస్థ పేర్కొంది. కేంద్ర పౌర విమానయాన శాఖ మంత్రి కింజరపు రామ్మోహన్ నాయుడు, మంత్రిత్వ శాఖ కార్యదర్శి వుమ్లున్‌మాంగ్ వుయల్నామ్, ఎయిర్‌బస్ ఇండియా, దక్షిణాసియా అధ్యక్షుడు రెమి మెయిలార్డ్, మహీంద్రా గ్రూప్ సీఈవో అనిష్ షా ఉన్న సమావేశంలో ఈ ఒప్పందం కుదిరింది. ఈ ప్రాజెక్టు ద్వారా మహీంద్రా, H130 హెలికాప్టర్ ఫ్యూజ్‌లేజ్ అసెంబ్లీలను ఉత్పత్తి చేసి, యూరప్‌లోని ఎయిర్‌బస్ సౌకర్యాలకు సరఫరా చేయనుంది.

మొదటి డెలివరీ 2027 మార్చి నాటికి పూర్తి కానుంది. మహీంద్రా గ్రూప్ సీఈవో డాక్టర్ అనిష్ షా మాట్లాడుతూ, “ఈ ఒప్పందం ఎయిర్‌బస్‌తో మా సుదీర్ఘ సంబంధాన్ని మరింత దృఢపరుస్తుంది. భారత ఏరోస్పేస్ పరిశ్రమను అంతర్జాతీయ స్థాయిలో ఉంచడంలో ఎయిర్‌బస్ ముఖ్యమైన భూమిక వహిస్తోంది. ‘మేక్ ఇన్ ఇండియా’ పట్ల మా అంకితభావాన్ని ఈ సహకారం తెలియజేస్తుంది” అని అన్నారు. ఎయిర్‌బస్ ఇండియా అధ్యక్షుడు రెమి మెయిలార్డ్ మాట్లాడుతూ, “భారతదేశంలో తయారీ, అసెంబ్లీ, ఇంజనీరింగ్ రంగాల్లో సమగ్ర వ్యవస్థను ఏర్పాటు చేసేందుకు మేము కృషి చేస్తున్నాం. ఈ ఒప్పందం భారత సరఫరా గొలుసు సామర్థ్యంపై మా విశ్వాసాన్ని సూచిస్తుంది” అని తెలిపారు. ప్రస్తుతం మహీంద్రా, ఎయిర్‌బస్ వాణిజ్య విమానాల కోసం వివిధ భాగాలను సరఫరా చేస్తోంది. భారత్ నుంచి ఎయిర్‌బస్ సంవత్సరానికి సుమారు 1.4 బిలియన్ డాలర్ల విలువైన భాగాలను సేకరిస్తోంది. H130 హెలికాప్టర్ ప్రయాణీకుల రవాణా, టూరిజం, వైద్య సహాయం వంటి విభిన్న రంగాల్లో వినియోగంలో ఉంది.