Mutual Funds: మ్యూచువల్ ఫండ్ ఇన్వెస్టర్లకు శుభవార్త..

హైదరాబాద్: భారత ఆర్థిక, వ్యాపార రంగాల్లో కీలక పరిణామాలు చోటుచేసుకుంటున్నాయి. యాక్సిస్ మ్యూచువల్ ఫండ్ ఓపెన్ నెట్‌వర్క్ ఫర్ డిజిటల్ కామర్స్ (ONDC)లో చేరింది. ఇది డిజిటల్ లావాదేవీలను సులభతరం చేసేందుకు వాణిజ్య మంత్రిత్వ శాఖ ఆధ్వర్యంలో DPIIT స్థాపించిన ఇంటర్‌ఆపరబుల్ నెట్‌వర్క్. ఈ చేరికతో యాక్సిస్ ఫండ్ పథకాల్లో పెట్టుబడులు సరళమవుతాయి. ముఖ్యంగా సేవలు తక్కువగా అందే ప్రాంతాల్లోని పెట్టుబడిదారులకు సులభంగా, సరసమైన రీతిలో అందుబాటులోకి వస్తాయి. ONDC డిజిటల్ ఇన్‌ఫ్రాస్ట్రక్చర్‌తో సంప్రదాయ అడ్డంకులు తొలగి, పెట్టుబడి విధానాలు నూతన రూపం సంతరించుకుంటాయి. యాక్సిస్ ఎఎంసీ సీఈఓ బి. గోప్‌కుమార్ మాట్లాడుతూ.. ఈ అనుసంధానం ఆర్థిక సమగ్రతలో విప్లవాత్మకమని, దూరప్రాంతాల్లోని లక్షల మందికి సంపద సృష్టి అవకాశాలు అందిస్తుందని తెలిపారు. ఓఎన్డీసీ ఫైనాన్షియల్ సర్వీసెస్ ఎస్వీపీ హృషికేష్ మెహతా మాట్లాడుతూ.. ఈ చేరిక డిజిటల్ ఇన్‌ఫ్రాస్ట్రక్చర్‌తో వ్యక్తులను సాధికారపరుస్తుందని, సమగ్ర పెట్టుబడి వాతావరణాన్ని అందిస్తుందని అన్నారు.

ఆరోహ ప్రారంభం..

మరోవైపు హైదరాబాద్‌లో ‘ఆరోహ’ అనే మానవ కేంద్రీకృత నాయకత్వ సంస్థ ఆవిర్భవించింది. భారతీయ తాత్విక సూత్రాలతో వ్యాపార నాయకత్వాన్ని రూపొందించడం దీని లక్ష్యం. కల్పనా సిన్హా, హరిత కందాళ్ల, కేతకీ కడేకర్ స్థాపించిన ఈ సంస్థ, 70 సంవత్సరాలకు పైగా నైపుణ్యంతో శిక్షణ, సామర్థ్య నిర్మాణం, సంస్థాగత రూపాంతరంలో సేవలందిస్తోంది. వేగవంతమైన మార్పులతో కూడిన వ్యాపార ప్రపంచంలో, ఆరోహ భారతీయ తత్వజ్ఞానం నుంచి పుట్టిన ఫ్రేమ్‌వర్క్‌లతో నాయకులకు స్థిరత్వం, అనుకూలత, ఉద్దేశపూరిత సంస్కృతుల నిర్మాణంలో సహాయపడుతుంది. 2025 ఇండియా బిజినెస్ లీడర్స్ సర్వే ప్రకారం, నాణ్యమైన ప్రతిభ ఆకర్షణ, జవాబుదారీతనం, సాంకేతిక అనుసరణ, భవిష్యత్ సంస్కృతులు కీలక సవాళ్లుగా ఉన్నాయి. కల్పనా సిన్హా మాట్లాడుతూ, భారతీయ తత్వశాస్త్రం నాయకుడిని సమష్టి శ్రేయస్సు కోసం పనిచేసే వ్యక్తిగా చూస్తుందని, ఇది స్థిరమైన వృద్ధి, ఆవిష్కరణలకు తోడ్పడుతుందని అన్నారు.