Studies Under the Tree చెట్టు కిందే చదువులు

• గిరిజన విద్యార్థులకు తప్పని అవస్థలు

మక్కువ రూరల్‌, నవంబరు 1(ఆంధ్రజ్యోతి): పనసభద్ర పంచాయతీ పరిధి చెలకమెండగి గ్రామంలోని మండల ప్రాఽథమిక పాఠశాలకు పక్కా భవనం లేదు. దీంతో ఇక్కడున్న 30 మంది విద్యార్థులు చెట్టు కిందే చదువులు కొనసాగించాల్సి వస్తోంది. వాస్తవంగా దుగ్గేరు గ్రామానికి సుమారు 5 కిలోమీటర్ల దూరంలో కొండపైన ఉన్న చెలకమెండగిలో పాఠశాల భవన నిర్మాణానికి 2014-2019లో నిధులు మంజూరయ్యాయి. అయితే పనులు చేపట్టేందుకు ఎవరూ ముందుకు రాకపోవడంతో నిధులు వెనక్కి మళ్లాయి. గత వైసీపీ ప్రభుత్వం కూడా ఈ పాఠశాల నిర్మాణంపై దృష్టి సారించలేదు. దీంతో విద్యార్థులకు ఇక్కట్లు తప్పడం లేదు. ప్రస్తుతం ఆరుబయటే వారికి తరగతులు నిర్వహిస్తున్నారు. వర్షం కురిస్తే .. ఇక ఆ రోజు పాఠశాలకు సెలవే. తమ గ్రామంలో బడికి పక్కాభవనం నిర్మించాలని ఆ గ్రామస్థులు అనేకసార్లు పార్వతీ పురం ఐటీడీఏ అధికారులకు వినతిపత్రాలు అందజేసినా ఫలితం లేకపోయింది. ఇప్పటికైనా ప్రభుత్వం, ఉన్నతాధికారులు స్పందించాలని వారు కోరుతున్నారు. దీనిపై మక్కువ ఎంఈవో శ్యామ్‌సుందరరావును వివరణ కోరగా.. నిధులు మంజూరైతే చెలకమెండంగిలో పాఠశాల భవన నిర్మాణం చేపడతామని తెలిపారు.