Cyber Crimes సైబర్‌ నేరాలపై అప్రమత్తం

సీతానగరం, ఆగస్టు 23(ఆంధ్రజ్యోతి): జిల్లా యువత సైబర్‌ నేరాలపై అప్రమత్తంగా ఉండాలని ఎస్పీ మాధవరెడ్డి సూచించారు. ఎటువంటి ప్రలోభాలకు గురికాకుండా మంచి నడవడికతో ఉన్నత శిఖరాలను అధిరోహించాలన్నారు. శ‌నివారం జోగింపేట సాంఘిక సంక్షేమ అంబేడ్కర్‌ గురుకులం ఆవరణలో పోలీస్‌శాఖ ఆధ్వర్యంలో సంకల్పం అవగాహన సదస్సు నిర్వహించారు. ఈ సందర్భంగా మాదక ద్రవ్యాల నిర్మూలన, మహిళా రక్షణ చట్టాలు తదితర అంశాలపై విద్యార్థులకు అవగాహన కల్పించారు. అనంతరం వారితో ప్రతిజ్ఞ చేయించారు. మాదకద్రవ్యాల జోలికి పోవద్దని, జీవితాలను నాశనం చేసుకోవద్దని సూచించారు. ఆ తర్వాత వీడియో ద్వారా డాక్యుమెంటరీని ప్రదర్శించారు. తల్లిదండ్రుల కలలు నిజం చేసే విధంగా నడుచుకోవాలని కోరారు. ఈ సదస్సులో ఏఎస్పీ అంకితా సురాన, జిల్లా ఇంటర్మీడియట్‌ శాఖాధికారి వై.నాగేశ్వరరావు, ప్రిన్సిపాల్‌ రాజారావు, వైద్యాధికారి ఉషారాణి, సీఐ గోవిందరావు, ఎస్‌ఐ ఎం.రాజేష్‌, ఎంఈవోలు తదితరులు పాల్గొన్నారు.

టంగుటూరికి ఘన నివాళి

బెలగాం: జిల్లా పోలీస్‌ కార్యాలయంలో టంగుటూరి ప్రకాశం జయంతిని నిర్వహించారు. ఈ సందర్భంగా ఆయన చిత్రపటానికి పూలమాలలు వేసి నివాళి అర్పించారు. న్యాయవాదిగా, స్వాతంత్య్ర సమరయోధుడిగా ప్రకాశం పంతుల సేవలు ఎనలేనివని ఎస్పీ తెలిపారు. తుపాకీకి ఎదురెళ్లి తెల్ల దొరలను హడలెత్తించిన వ్యక్తి ‘ఆంధ్ర కేసరి’ టంగుటూరి ప్రకాశం పంతులు అని కొనియాడారు. ఈ కార్యక్రమంలో పోలీస్‌ అధికారులు, సిబ్బంది తదితరులు పాల్గొన్నారు.