ప్రతి విద్యార్థికి విద్యామిత్ర కిట్‌

జిల్లాలో లక్షా 69 వేల 175 మంది విద్యార్థులకు పంపిణీ

పాఠశాలలు పునఃప్రారంభం నాటికి అందించేందుకు సన్నాహాలు

ఇప్పటికే మండలాలకు చేరిన కిట్లు

ఈ ఏడాది నుంచి జూనియర్‌ ఇంటర్‌ విద్యార్థులకు కూడా కిట్‌లు

(పాడేరు-ఆంధ్రజ్యోతి)

విద్యారంగంలో పలు సంస్కరణలను అమలు చేస్తున్న రాష్ట్ర ప్రభుత్వం, గతానికి భిన్నంగా పాఠశాలలు పునఃప్రారంభం నాటికే విద్యార్థులకు అవసరమైన బ్యాగు, పుస్తకాలు, యూనీఫారం, బూట్లు, నిఘంటువులు అందించాలని నిర్ణయించింది. ‘సర్వేపల్లి రాధాకృష్ణన్‌ విద్యామిత్ర కిట్‌’ పేరిట ప్రతి విద్యార్థికి స్టూడెంట్‌ కిట్‌ను అందించేందుకు చర్యలు చేపడుతోంది. గతంలో విద్యా సంవత్సరం ప్రారంభమైన కొన్ని నెలలకు కూడా సంపూర్ణంగా విద్యార్థులకు బుక్స్‌, బూట్లు, బ్యాగులు అందని పరిస్థితి కొనసాగేది. అటువంటి పరిస్థితులు ఏర్పడకుండా విద్యామిత్ర కిట్‌లను ఈఏడాది మే నెలలోనే జిల్లా కేంద్రాలకు సరఫరా చేశారు. అక్కడి నుంచి మండల కేంద్రాలకు చేరవేసి, తద్వారా విద్యార్థులకు అందించేలా సమగ్ర శిక్ష అధికారులు ఏర్పాట్లు చేస్తున్నారు. అందుకుగానూ జిల్లా, డివిజన్‌, మండల, పాఠశాల స్థాయిల్లో ప్రత్యేకంగా కమిటీలను ఏర్పాటు చేశారు. ఆయా కమిటీ ఆధ్వర్యంలో ప్రతి విద్యార్థికి విద్యామిత్ర కిట్‌లను పంపిణీ చేయనున్నారు. అలాగే జూన్‌ నెల ప్రారంభం కాగానే నోట్‌, టెక్ట్స్‌ బుక్స్‌, ఇతర సామగ్రిలను మండల కేంద్రాల్లోనే స్టాక్‌ పాయింట్‌ల వద్ద మండలంలోని టీచర్లకు పంపిణీ చేస్తున్నారు. పాఠశాల పునఃప్రారంభం కాగానే వాటిని విద్యార్థులకు అందిస్తారు.

జిల్లాలో లక్షా 69 వేల 175 మందికి మిత్రా కిట్‌లు

జిల్లాలోని 2,913 పాఠశాలల్లోని 1 నుంచి 10వ తరగతి విద్యార్థులతోపాటు 43 ప్రభుత్వ జూనియర్‌ కాలేజీల్లోని విద్యార్థులతో కలిపి మొత్తం ఒక లక్షా 69 వేల 175 మందికి విద్యామిత్ర కిట్‌లను అందించేందుకు అధికారులు చర్యలు తీసుకున్నారు. గతంలో ఇంటర్‌ విద్యార్థులకు ఎటువంటి విద్యాకిట్‌లు అందించిన దాఖాలాలు లేవు. కాని ఈఏడాది నుంచి ఇంటర్‌ మొదటి సంవత్సరం విద్యార్థులకు విద్యామిత్ర కిట్‌లను అందించాలని ప్రభుత్వం నిర్ణయించింది. జిల్లాలో విద్యామిత్ర కిట్‌ను పక్కాగా పంపిణీ చేసేందుకు అవసరమైన అన్ని ఏర్పాట్లు చేశామని సమగ్ర శిక్షా ఏపీసీ డాక్టర్‌ ఏ.స్వామినాయుడు తెలిపారు.

జిల్లాలో స్టూడెంట్స్‌, కిట్‌ సామగ్రి వివరాలు....

ు బాలురు: 82,757

ు బాలికలు : 86,418

ు బ్యాగులు: 1,69,175

ు నోట్‌ బుక్స్‌: 7,44,474

ు టెక్స్‌ బుక్స్‌: 25,50,151

ు బూట్లు: 1,68,872

ు బెల్ట్‌లు : 1,31,673

ు డిక్షనరీలు: 32,128

ు చొక్కాలు : 82,757

ు నిక్కర్లు/ప్యాంట్‌లు: 82,757

ు చుడీదార్‌లు, గౌన్లు: 86,418