కుమార్తె పెళ్లి ఆగిపోపోవడంతో తండ్రి ఆత్మహత్య

మృతుడు రియల్‌ ఎస్టేట్‌ వ్యాపారి

విశాఖపట్నం, నవంబరు 26 (ఆంధ్రజ్యోతి): కుమార్తె పెళ్లి ఆగిపోవడంతో మనస్తాపానికి గురై రియల్‌ ఎస్టేట్‌ వ్యాపారి పురుగుల మందుతాగి ఆత్మహత్య చేసుకున్నారు. ఈ ఘటనకు సంబంధించి మృతుడి తల్లి పోలీసులకు తెలిపిన వివరాలిలా ఉన్నాయి. హైదరాబాద్‌కు చెందిన ర్యాలీ శ్రీనివాసరావు (57) అక్కడ రియల్‌ ఎస్టేట్‌ వ్యాపారం చేస్తుంటారు. భార్య, కుమార్తె, కుమారుడు హైదరాబాద్‌లో ఉంటుండగా, శ్రీనివాసరావు మాత్రం తన తల్లి సత్యవతితో కలిసి పీఎం పాలెంలోని ఐబీఆర్‌ ఎన్‌క్లేవ్‌లో నివాసం ఉంటున్నారు. శ్రీనివాసరావు అప్పుడప్పుడు హైదరాబాద్‌లోని భార్యాపిల్లలు వద్దకు వెళ్లి వస్తుంటారు. ఆయన కుమార్తె హైదరాబాద్‌లోని ఒక కార్పొరేట్‌ ఆస్పత్రిలో వైద్యురాలిగా పనిచేస్తోంది. ఆమెకు పెందుర్తి సమీపంలోని చినముషిడివాడకు చెందిన బోని శ్రీనివాసరావు కుమారుడి (బ్యాంకు ఉద్యోగి)తో ఈ ఏడాది మార్చిలో పెళ్లి నిశ్చయమైంది. ఈనెల 25న వివాహం చేయాలని ముహూర్తం పెట్టుకున్నారు. కుమార్తె పెళ్లికి సంబంధించి బంధువులు, స్నేహితులకు కార్డులు పంపిణీ చేయడంతోపాటు ఏర్పాట్లన్నీ శ్రీనివాసరావు పూర్తిచేశారు. ఇంతలో ఏమైందోగానీ పెళ్లిని రద్దు చేసుకుంటున్నట్టు పెళ్లి కుమారుడి తరపువాళ్లు శ్రీనివాసరావుకు చెప్పారు. దీంతో ఆయన పెళ్లి కుమారుడి ఇంటికి వెళ్లి పెళ్లి రద్దు చేసుకోవద్దని కాళ్లావేళ్లాపడి వేడుకున్నారు. కానీ వారి నిర్ణయం మారకపోవడంతో తీవ్ర మనస్తాపానికి గురయ్యారు. విజయనగరంలో పెళ్లికి వెళుతున్నానని తల్లికి చెప్పి మంగళవారం (ఈనెల 25) రాత్రి ఏడు గంటల సమయంలో శ్రీనివాసరావు ఇంటి నుంచి బయటకు వచ్చిన చేరలేదు. బుధవారం ఉదయం సుమారు ఆరు గంటల సమయంలో పోలీస్‌ కానిస్టేబుల్‌ ఒకరు సత్యవతికి ఫోన్‌ చేసి ‘మీ కుమారుడి కారు పీఎం పాలెం క్రికెట్‌ స్టేడియం వద్ద సర్వీసు రోడ్డులో ఉంది. ఆయన చనిపోయి ఉన్నాడు. పక్కన పురుగుల మందు డబ్బా ఉందని’ సమాచారం ఇచ్చారు. దీంతో ఆమె గాజువాకలో ఉంటున్న తన అల్లుడు, కుమారుడి బావమరిదికి సమాచారం ఇవ్వడంతో వారు అక్కడకు వె ళ్లారు. కాగా శ్రీనివాసరావు తాను తీవ్ర మనస్తాపానికి గురయ్యానని హైదరాబాద్‌లో ఉంటున్న తన కుమారుడితోపాటు గాజువాకలో ఉంటున్న సోదరి భర్త, తన బావమరిదికి, స్నేహితుడికి సూసైట్‌నోట్‌ను వాట్సాప్‌లో పంపించారు. మృతుడు శ్రీనివాసరావు తల్లి సత్యవతి ఫిర్యాదు మేరకు పీఎం పాలెం పోలీసులు కేసు నమోదుచేసి దర్యాప్తుచేస్తున్నారు.