టెక్కలి డివిజన్‌లోకి నందిగాం

పలాస నుంచి మార్పు

ప్రభుత్వం ప్రాథమిక నోటిఫికేషన్‌ జారీ

అభ్యంతరాలకు 30 రోజుల గడువు

శ్రీకాకుళం, నవంబరు 27(ఆంధ్రజ్యోతి): శ్రీకాకుళం జిల్లా రెవెన్యూ విభాగాల్లో రాష్ట్ర ప్రభుత్వం కీలక మార్పులు చేపట్టింది. పరిపాలనా సౌలభ్యం, ప్రాంతీయ అభివృద్ధిని దృష్టిలో ఉంచుకుని జిల్లాలో నందిగాం మండలాన్ని పలాస డివిజన్‌ నుంచి టెక్కలి డివిజన్‌కు మార్చింది. ఈ మేరకు రెవెన్యూ శాఖ ప్రత్యేక ప్రధాన కార్యదర్శి సాయిప్రసాద్‌ గురువారం ఉత్తర్వులు(జీవో ఆర్టీ 1490) జారీచేశారు. ఇది కేవలం ముసాయిదా(ప్రాథమిక) నోటిఫికేషన్‌ మాత్రమేనని ఉత్తర్వుల్లో స్పష్టం చేశారు. ఆంధ్రప్రదేశ్‌ జిల్లా ఏర్పాటు చట్టం-1974 నిబంధనల ప్రకారం ఈ మార్పులు చేస్తున్నట్లు పేర్కొన్నారు. ప్రజల అభిప్రాయాలను పరిగణనలోకి తీసుకున్న తర్వాతే దీనిపై తుది నిర్ణయం వెలువడనుంది. నందిగాం మండలాన్ని టెక్కలి డివిజన్‌లో కలుపుతూ ప్రభుత్వం చేసిన ఈ ప్రతిపాదనపై ప్రజలకు ఏవైనా అభ్యంతరాలు లేదా సూచనలు ఉంటే తెలియజేయడానికి అవకాశం కల్పించారు. ఈ గెజిట్‌ నోటిఫికేషన్‌ విడుదలైన తేదీ నుంచి 30రోజుల్లోగా కలెక్టర్‌కు లిఖితపూర్వకంగా(తెలుగు లేదా ఇంగ్లీషులో) తమ అభ్యంతరాలను సమర్పించవచ్చని ప్రభుత్వం స్పష్టం చేసింది. ఈ మార్పుపై స్థానికంగా ప్రజల స్పందన ఎలా ఉంటుందనేది ఆసక్తికరంగా మారింది. గడువులోగా వచ్చిన వినతులను ప్రభుత్వం పరిశీలించి తుది నిర్ణయం తీసుకోనుంది.