Dr. Maru : నాస్తికోద్యమ నాయకురాలు డాక్టర్‌ మారు మృతి

అనారోగ్యంతో విజయవాడలో కన్నుమూత

విజయవాడ (పటమట), ఫిబ్రవరి 6(ఆంధ్రజ్యోతి): ప్రముఖ వైద్యురాలు, సామాజిక సేవకురాలు, నాస్తికోద్యమ నాయకురాలు సరస్వతి గోరా 4వ కుమార్తె డాక్టర్‌ మారు (80) అనారోగ్యంతో గురువారం కన్నుమూశారు. ఆమె డాక్టర్‌ సమరానికి సోదరి. వీరిద్దరూ విజయవాడలో 55 ఏళ్లుగా వాసవ్య నర్సింగ్‌ హోం ద్వారా సేవలందిస్తున్నారు. డాక్టర్‌ మారు.. అనేక గ్రామాల్లోను, గిరిజన ప్రాంతాల్లోను సేవలందించడమే కాకుండా మూఢనమ్మకాల నిర్మూలనకు ఎంతో కృషిచేశారు. కొన్ని వేలమంది పోలియో కలిగిన చిన్నారులకు ఉచితంగా శస్త్రచికిత్స చేయించారు. శుక్లాల ఆపరేషన్లు వేలల్లో చేయించడమే కాకుండా, వందలాది మందికి నర్సింగ్‌ ట్రైనింగ్‌ అందించడంలోనూ ఆమెది కీలకపాత్ర. ఆమె మృతి విషయం తెలియగానే, వందల సంఖ్యలో అభిమానులు, ఆమె ద్వారా ప్రయోజకులైన వారు తరలివచ్చి నివాళులర్పించారు. ఆమె నేత్రాలను స్వేచ్ఛ గోరా ఐ బ్యాంక్‌కు దానం చేశారు. ఆమె అంతిమ యాత్ర శుక్రవారం మధ్యాహ్నం 3 గంటలకు విజయవాడ నాస్తిక కేంద్రం నుంచి ప్రారంభమవుతుందని నాస్తిక కేంద్రం నిర్వాహకులు తెలిపారు.