మహాకుంభాభిషేకం కలశయాత్రలో పాల్గొననున్న ఏనుగు

ఏర్పాట్లను పరిశీలించిన అటవీశాఖ అధికారులు

19న గుండ్లకమ్మ నది నుంచి శింగరకొండ వరకు వెయ్యి మంది మహిళలతో కలశ పాదయాత్ర

మహాకుంభాభిషేకం కలశయాత్రలో పాల్గొననున్న ఏనుగు

అద్దంకి, మే 11 (ఆంధ్రజ్యోతి) : శింగరకొండ ప్రసన్నాంజనేయస్వామి దేవస్థానం మహాకుంభాభిషేకం సంద ర్భంగా కలశయాత్రలో పాల్గొనేందుకు ఏనుగు వస్తున్న నేపథ్యంలో శింగరకొండలో ఏర్పాట్లను ఆదివారం అటవీశాఖ అధికారులు, ఈవో తిమ్మానాయుడు పరిశీలించారు. కర్ణాటక రాష్ట్రం రాయచూర్‌ నుంచి ప్రత్యేకంగా ఏనుగును తీసుకురానున్నారు. 19వ తేదీ ఉదయం 5 గంటలకు అద్దంకి సమీపంలోని గుండ్లకమ్మ నది నుంచి వెయ్యి మందికి పైగా మహిళలతో కలశ పాదయాత్ర ప్రారంభమై పట్టణంలో గుండా శింగరకొండ వరకు సాగనుంది. కలశపాద యాత్ర ముందు భాగంలో ఏనుగు నడవనుంది. అదే సమయంలో అభిషేకంలో ఏనుగు పాల్గొననుంది. ఈ నేపథ్యంలో 16వ తేదీకి ఏనుగు శింగరకొండ చేరుకొని 20వ తేదీ తిరిగి వెళ్లనుంది. ఈ నేపధ్యంలో విశ్రాంతి తీసుకునేందుకు అవసరమైన ఏర్పాట్లను ఆదివారం చీరాల ఫారెస్ట్‌ రేంజ్‌ ఆఫీసర్‌ రమణారావు, వేటపాలెం సెక్షన్‌ ఆఫీసర్‌ వెంకటేశ్వర్లు, కూకట్లపల్లి బీట్‌ ఆఫీసర్‌ రమేష్‌, ఈవో పరిశీలించారు.