గ్రామీణ రహదారుల అభివృద్ధికి ప్రాధాన్యం

పాణ్యం ఎమ్మెల్యే గౌరు చరితారెడ్డి

కల్లూరు, జూలై 23(ఆంధ్రజ్యోతి): గ్రామీణ రహదారుల అభివృద్ధికి కూటమి ప్రభుత్వం పెద్దపీట వేస్తుందని పాణ్యం ఎమ్మెల్యే గౌరు చరితారెడ్డి అన్నారు. బుధవారం కల్లూరు మండలం కొంగనపాడులో ఎమ్మెల్యే బీటీ రోడ్డు, సీసీ రోడ్లను ప్రారంభించారు. ఈ సందర్భంగా గౌరు చరిత మాట్లాడుతూ గత వైసీపీ పాలనలో రాష్ట్ర వ్యాప్తంగా రహదారులు అధ్వానంగా మారాయని, కూటమి ప్రభుత్వం రహదారుల ఏర్పాటుకు శ్రీకారం చుట్టిందన్నారు. అందులో భాగంగా బెంగళూరు జాతీయ రహదారి నుంచి 4 కిలో మీటర్ల మేర రూ.3.31 కోట్లతో బీటీ రోడ్డు నిర్మాణం పూర్తి చేశామన్నారు. అలాగే కొంగనపాడు గ్రామంలో రూ.45లక్షలతో పూర్తి చేసిన 5 సీసీ రోడ్లను ఎమ్మెల్యే ప్రారంభించారు. కార్యక్రమంలో పంచాయతీరాజ్‌ డీఈ నాగిరెడ్డి, ఏఈలు హనుమంతరెడ్డి, రవిమోహన్‌రెడ్డి, ఏపీ ఫైనాన్స్‌ కార్పొరేషన్‌ డైరెక్టర్‌ డి.రామాంజనేయులు, ఏపీ టూరిజం డైరెక్టర్‌ ముంతాజ్‌బేగం, టీడీపీ నాయకులు టి.వినోద్‌కుమర్‌, నాగయ్య, గోరంట్ల, లక్ష్మయ్య, మురళి, గోపాల్‌రెడ్డి పాల్గొన్నారు.