దేశ నిర్మాణంపై ఎన్‌సీసీ క్యాడెట్లలో బాధ్యత

• కాకినాడ గ్రూప్‌ కమాండర్‌ కల్నల్‌ అగర్వాల్‌

• దివాన్‌చెరువులో ప్రత్యేక జాతీయ సమగ్రత శిబిరం

దివాన్‌చెరువు, సెప్టెంబరు 25(ఆంధజ్ర్యోతి): సమాజ జీవనం ద్వారా ఎన్‌సీసీ క్యాడెట్ల దేశనిర్మాణం పట్ల ఐక్యతను, బాధ్యతను పెంపొందించుకుంటారని కాకినాడ గ్రూప్‌ కమాండర్‌ కల్నల్‌ ఆర్‌ఎం అగర్వాల్‌ అన్నారు. ప్రత్యేక జాతీయ సమగ్రత శిబిరం రాజానగరం మండలం దివాన్‌చెరువులోని శ్రీప్రకాష్‌ విద్యానికేతన్‌లో నిర్వహిస్తున్నారు. ఈ సందర్భంగా గురువారం ఏర్పాటుచేసిన విలేకరుల సమావేశంలో 3వ ఆంధ్ర బాలికల ఎన్‌సీసీ కమాండింగ్‌ అధికారి కల్నల్‌ హెచ్‌ఎస్‌ మానిక్‌తో కలసి ఆయన మాట్లాడారు. ఆంధ్రప్రదేశ్‌, తెలంగాణా ఆధ్వర్యంలో కాకినాడ ఎన్‌సీసీ గ్రూప్‌ ప్రధాన కార్యాలయం ప్రతిష్టాత్మకంగా ఈ పాన్‌ ఇండియా ఎన్‌సీసీ శిక్షణా కార్యక్రమం నిర్వహిస్తోందన్నారు. ఈ శిబిరంలో ఆటల పోటీలు, వ్యక్తిగత, సమూహ పోటీలు, విద్యాపర్యటనలు, ప్రేరణాత్మక ఉపన్యాసాలు, సామాజిక సేవార్యాలీలు వంటి కార్యక్రమాలు ఉంటాయని చెప్పారు. ఈ కార్యకలాపాలు క్యాడెట్లులో నాయకత్వం, క్రమశిక్షణ, స్నేహాన్ని పెంపొందించడానికి ఉపయోగపడతాయన్నారు. కల్నల్‌ మానిక్‌ మాట్లాడుతూ దేశవ్యాప్తంగా 29 రాష్ట్రాలు, 7 కేంద్రపాలిత ప్రాంతాల వైవిధ్యాన్ని సూచించే 17 ఎన్‌సీసీ డైరెక్టరేట్‌ల నుంచి ఎంపిక చేసిన 300 మంది క్యాడెట్లు ఈ శిబిరంలో పాల్గొన్నారని చెప్పారు. వీరిలో ఏపీ నుంచి 26 మంది, తెలంగాణా నుంచి 18 మంది హాజరయ్యారన్నారు. ఈ శిబిరం అక్టోబరు 5 వరకూ జరుగుతుందని పేర్కొన్నారు. కాగా శిబిరంలో భాగంగా విజన్‌ ఆఫ్‌ ఇండియా-2050 అనే అంశంపై పెయింటింగ్‌ పోటీలు నిర్వహించారు. వివిధ రాష్ట్రాలకు చెందిన క్యాడెట్లు ఉత్సాహంగా పాల్గొన్నారు.