రైతు భరోసాకు నిధుల భరోసా!

భూమి తనఖా పెట్టి రూ.10 వేల కోట్ల అప్పు

రుణం ఇవ్వడానికి ఐసీఐసీఐ బ్యాంకు సిద్ధం

ఆడిటింగ్‌ పూర్తి చేసి ఆర్‌బీఐని ఒప్పించే పనిలో టీజీఐఐసీ

ఈ నెలాఖరుకల్లా దక్కనున్న రుణం

హైదరాబాద్‌, డిసెంబరు 10 (ఆంధ్రజ్యోతి): రైతు భరోసాకు అవసరమైన నిధుల విషయంలో రాష్ట్ర ప్రభుత్వానికి భరోసా లభించినట్లు తెలిసింది. సంక్రాంతి నుంచి అమలు చేస్తామని ప్రకటించిన ఈ పథకానికి నిధుల సమీకరణ కొలిక్కి వచ్చినట్లు సమాచారం. రైతు భరోసాకు దాదాపు రూ.10 వేల కోట్లు అవసరమవుతాయి. తెలంగాణ పారిశ్రామిక మౌలిక సదుపాయాల సంస్థ(టీజీఐఐసీ) అధీనంలోని భూమిని తనఖా పెట్టి రూ.10 వేల కోట్ల రుణం తీసుకోవాలని సర్కారు నిర్ణయించింది. ఈ ప్రక్రియ కొలిక్కి వచ్చినట్లు ప్రభుత్వ ఉన్నత వర్గాలు తెలిపాయి. 9.6 శాతం వార్షిక వడ్డీతో రూ.10 వేల కోట్ల అప్పు ఇవ్వడానికి ఐసీఐసీఐ బ్యాంకు ముందుకొచ్చినట్లు తెలిసింది. ఈ నెలాఖరులోగా రుణం అందవచ్చని, జనవరి నుంచి అమలు చేసే రైతు భరోసా పథకానికి ఆ సొమ్మును వినియోగించే అవకాశాలున్నాయని ప్రభుత్వ వర్గాలు తెలిపాయి.

కోకాపేట, రాయదర్గంలో టీజీఐఐసీ అధీనంలోని 400 ఎకరాల భూముల్ని తనఖా పెట్టి అప్పు తీసుకోవాలని భావించిన సర్కారు.. ఆ మేరకు భారత రిజర్వ్‌ బ్యాంకు (ఆర్‌బీఐ)కు ప్రతిపాదనలు పంపింది. కానీ, వాటిని ‘ఆడిటింగ్‌’ కొర్రీతో ఆర్‌బీఐ వెనక్కి పంపింది. ఓవైపు ఈ ఆడిటింగ్‌ను కొలిక్కి తెచ్చే చర్యలు చేపడుతూనే మరోవైపు బ్యాంకుల కన్సార్షియంతో టీజీఐఐసీ సంప్రదింపులు జరిపింది. ఆడిటింగ్‌ను పూర్తి చేసి, ఆర్‌బీఐని ఒప్పించే పనిలో పడింది. దీంతో ఐసీఐసీఐ బ్యాంకు రుణం ఇవ్వడానికి ముందుకొచ్చింది. ఈ నెలాఖరులోగా రూ.10 వేల కోట్ల రుణం తీసుకునే అవకాశాలు ఎక్కువగా ఉన్నాయని ప్రభుత్వంలోని కీలక వ్యక్తి ఒకరు చెప్పారు. మరోవైపు ఈ నెలాఖరు నాటికి 7000 మందికిపైగా ఉద్యోగులు పదవీ విరమణ చేయనున్నారు. వారికి చెల్లించే ప్రయోజనాల కోసం రూ.2000 కోట్లకు పైగా నిధులు కావాలి. వీటన్నింటిని దృష్టిలో పెట్టుకుని ప్రభుత్వం రూ.10 వేల కోట్ల రుణం తీసుకునేందుకు చర్యలు చేపడుతోంది.