బిల్డాక్స్‌ సంస్థకు రూ. 3.96 కోట్ల జరిమానా

ఫేస్‌బుక్‌ ద్వారా తప్పుడు సమాచారం చేరవేస్తున్నందుకు రెరా ఫైన్‌

హైదరాబాద్‌, ఏప్రిల్‌ 4 (ఆంధ్రజ్యోతి): నిబంధనలకు విరుద్ధంగా వ్యవహరిస్తున్న బిల్డాక్స్‌ సంస్థకు రెరా రూ.3.96 కోట్ల అపరాధ రుసుం విధించింది. ఫేస్‌బుక్‌ ద్వారా ప్రజలకు తప్పుడు సమాచారం చేరవేస్తూ కొనుగోలుదారుల నుంచి నగదు వసూళ్లకు పాల్పడుతున్నట్లు గ్రహించి ఈ అపరాధ రుసుం విధించినట్లు రెరా చైర్మన్‌ ఎన్‌. సత్యనారాయణ తెలిపారు. బిల్డాక్స్‌ ప్రాజెక్టు విషయంలో రెరా ట్రిబ్యునల్‌ గురువారం విచారణ చేపట్టింది. బిల్డాక్స్‌ తరఫు న్యాయవాదులు కౌంటర్‌ దాఖలు చేయడానికి 3 వారాల సమయం కావాలని కోరినప్పటికి సామాజిక మాధ్యమాల్లో బిల్డాక్స్‌ ప్రకటన కొనసాగించడాన్ని తీవ్రంగా పరిగణించి, కొనుగోలుదారులు మోసాల బారిన పడకుండా వారిని అప్రమత్తం చేసేలా ఈ అపరాధ రుసుం విధించినట్లు రెరా తెలిపింది.