మళ్లీ మణుగూరు ప్యాసింజర్‌ నడపాలి

తెలంగాణలోని ఉమ్మడి ఖమ్మం, వరంగల్ జిల్లాల్లో మణుగూరు నుంచి కాజీపేటకు నడిచే మణుగూరు ప్యాసింజర్‌ రైలు గ్రామీణ, పట్టణ ప్రయాణికులకు అనుకూలంగా ఉండేది. కరోనా వైరస్ ప్రారంభం కాకముందు నడిచిన ఈ రైలును తిరిగి ప్రయాణికుల సౌకర్యార్థం పునః ప్రారంభించాలని రైల్వే అధికారులకు, ప్రజా ప్రతినిధులకు ప్రయాణికులు విజ్ఞప్తి చేస్తున్నారు. ఈ రైలు మణుగూరు, కొత్తగూడెం, డోర్నకల్, మహబూబాబాద్, కేసముద్రం, నెక్కొండ, వరంగల్, కాజీపేట స్టేషన్ల నుంచి ప్రయాణించే వారికి ఎంతో అనుకూలంగా ఉంటుంది. ఈ మధ్యకాలంలో ఎక్స్‌ప్రెస్ రైళ్లతో సమానంగా ప్యాసింజర్ రైళ్లకు కూడా ప్రయాణ చార్జీలను పెంచారు. మణుగూరు ప్యాసింజర్‌ రైలు ప్రయాణ చార్జీలను కూడా గతంలో ఉన్నట్లుగానే తగ్గించాలి.

ఈదునూరి వెంకటేశ్వర్లు

నెక్కొండ