పశ్చిమ బెంగాల్‌లో రెండు గూడ్స్‌ రైళ్లు ఢీ

పట్టాలు తప్పిన 12 బోగీలు

బంకూరా, జూన్‌ 25: పశ్చిమ బెంగాల్‌లోని బంకూరాలో ఆదివారం రెండు గూడ్స్‌ రైళ్లు ఢీకొనడం కలకలం రేపింది. ఓండా స్టేషన్‌లో ఒక రైలును మరో రైలు వెనుక నుంచి వచ్చి ఢీ కొట్టడంతో 12 బోగీలు పట్టాలు తప్పాయి. ఈ ప్రమాదంలో ప్రాణనష్టం వాటిల్లనప్పటికీ.. ఒక రైల్లోని డ్రైవర్‌కు స్వల్పంగా గాయాలయ్యాయని రైల్వే అధికారులు తెలిపారు. ‘‘రెండు రైళ్లలోనూ అన్నీ ఖాళీ బోగీలే ఉండటంతో పెద్దగా నష్టం సంభవించలేదు. ఈ ప్రమాదం ఎలా జరిగిందన్నదానిపై స్పష్టత రావాల్సి ఉంది. ఘటన కారణంగా రైళ్ల రాకపోకలు నిలిచిపోయాయి. వీలైనంత త్వరగా పరిస్థితిని చక్కదిద్దేందుకు సిబ్బంది యత్నిస్తున్నారు’’ అని వివరించారు. ఈ ప్రమాదం కారణంగా బెంగాల్‌లోని పశ్చిమ మిడ్నాపూర్‌, బంకూరా, పురూలియా, బుర్ద్వాన్‌ జిల్లాలతో పాటు ఝార్ఖండ్‌లోని ధన్‌బాద్‌, బొకారో, సింఘ్‌భూమ్‌ ప్రాంతాలకు వెళ్లే రైళ్ల రాకపోకలకు ఆటంకం ఏర్పడింది. కాగా, ఈ నెల 2న కోరమాండల్‌ ఎక్స్‌ప్రెస్‌ మరో రెండు రైళ్లను ఢీకొట్టడంతో 275మంది ప్రాణాలను కోల్పోయిన దుర్ఘటన మరువక ముందే మరో ప్రమాదం చోటుచేసుకోవడం పట్ల ప్రజల నుంచి ఆందోళనలు వ్యక్తమవుతున్నాయి.