రెజ్లర్లకు ‘1983’ హీరోల మద్దతు

న్యూఢిల్లీ: బీజేపీ ఎంపీ బ్రిజ్‌భూషణ్‌పై లైంగిక వేధింపుల ఆరోపణలు చేస్తున్న భారత రెజ్లర్లకు 1983 వన్డే ప్రపంచకప్‌ జట్టు ఆటగాళ్లు మద్దతు పలికారు. అలాగే కేంద్రం స్పందించకపోతే తమ పతకాలను గంగానదిలో కలిపేస్తామనే హెచ్చరికను వెనక్కి తీసుకోవాలని కపిల్‌ నేతృత్వంలోని ఆటగాళ్ల బృందం ఓ ప్రకటనలో కోరింది. ‘రెజ్లర్లతో పోలీసుల దురుసు ప్రవర్తన బాధ కలిగించింది. అలాగే కఠోర శ్రమతో సాధించిన పతకాలను గంగా నదిలో కలిపేయాలన్న వారి ఆలోచన కూడా మమ్మల్ని ఆందోళనకు గురిచేసింది. ఎందుకంటే ఆ పతకాల సాధన వెనుక ఎంతో శ్రమ, త్యాగం ఉన్నాయి. అవి వారికి గుర్తింపును తేవడమే కాకుండా, ఈ దేశ ప్రతిష్ఠ కూడా వాటిలో ఇమిడి ఉన్న విషయం గుర్తుంచుకోవాలి. అందుకే ఈ విషయంలో రెజ్లర్లు ఎలాంటి తొందరపాటు నిర్ణయమూ తీసుకోకూడదు. అలాగే వారి డిమాండ్‌కు వీలైనంత త్వరలోనే పరిష్కారం లభిస్తుందని ఆశిస్తున్నాం. చట్టం తన పని తాను చేస్తుంది’ అని వారు రెజ్లర్లకు తమ మద్దతును తెలియజేశారు.