ఒకే ఓవర్లో 5 వికెట్లు
ABN , First Publish Date - 2023-02-27T02:20:58+05:30 IST
ఆస్ట్రేలియా దేశవాళీ క్రికెట్లో అరుదైన ఘటన చోటు చేసుకొంది. మహిళల జాతీయ క్రికెట్ లీగ్ వన్డే ఫైనల్లో టాస్మేనియా జట్టు చివరి ఓవర్లో ఏకంగా ఐదు వికెట్లు కూల్చింది.
ఆస్ట్రేలియా దేశవాళీ క్రికెట్లో అరుదైన ఫీట్
హోబర్ట్: ఆస్ట్రేలియా దేశవాళీ క్రికెట్లో అరుదైన ఘటన చోటు చేసుకొంది. మహిళల జాతీయ క్రికెట్ లీగ్ వన్డే ఫైనల్లో టాస్మేనియా జట్టు చివరి ఓవర్లో ఏకంగా ఐదు వికెట్లు కూల్చింది. ఒక్క పరుగు (డ/లూ) తేడాతో సౌత్ ఆస్ట్రేలియా జట్టుపై ఉత్కంఠ విజయం సాధించింది. తొలుత బ్యాటింగ్ చేసిన టాస్మేనియా నిర్ణీత 50 ఓవర్లలో 264 పరుగులకు ఆలౌటైంది. ఛేదనలో వర్షం ఆటంకం కలిగించే సమయానికి సౌత్ ఆస్ట్రేలియా 44 ఓవర్లలో 220/5 స్కోరు చేసింది. డక్వర్త్/లూయిస్ పద్ధతి ప్రకారం అప్పటికే సౌత్ ఆస్ట్రేలియా టీమ్ 5 పరుగుల ఆధిక్యంలో ఉంది. కానీ, వర్షం ఆగిపోవడంతో లక్ష్యాన్ని 47 ఓవర్లలో 243 రన్స్కు కుదించారు. అయితే, చివరి ఓవర్లో గెలుపునకు 4 పరుగులు కావాల్సి ఉండగా.. నాటకీయ రీతిలో 2 పరుగులు మాత్రమే చేసిన సౌత్ ఆస్ట్రేలియా మిగిలిన 5 వికెట్లు చేజార్చుకొని 241 రన్స్కు ఆలౌటైంది. చివరి ఓవర్ను బౌల్ చేసిన సారా కాయ్టే మూడు వికెట్లు పడగొట్టగా.. ఇద్దరు రనౌటయ్యారు.
