NRI: విదేశీయుల కోసం కెనడా కొత్త పథకం

ఎన్నారై డెస్క్: కెనడాలో స్థరపడాలనుకుంటున్న విదేశీయుల కోసం అక్కడి ప్రభుత్వం మరో కొత్త విధానాన్ని ప్రవేశపెట్టింది. కేటగిరీ ఆధారిత ఎక్స్‌ప్రెస్ ఎంట్రీ పేరిట ప్రవేశపెట్టిన ఈ విధానంలో కెనడా ప్రభుత్వం ఎంపిక చేసిన రంగాల్లో నిపుణులైన విదేశీ కార్మికులు దేశంలో శాశ్వత నివాసార్హతకు దరఖాస్తు చేసుకునేందుకు ప్రత్యేకంగా ఆహ్వానిస్తుంది. ఈ ఏడాది ఫ్రెంచ్ భాషా నిపుణులు, వైద్య రంగం, సైన్స్ టెక్నాలజీ, ఇంజినీరింగ్‌, గణితంతో పాటూ కార్పెంటర్లు, ప్లంబర్లు, కాంట్రాక్టర్లుకు, రవాణా రంగంలోని వారిని ఎంపిక చేసేందుకు నిర్ణయించింది.

ఈ విధానానికి సంబంధించి పూర్తి వివరాలను త్వరలో విడుదల చేస్తామని కెనడా వలసల శాఖ మంత్రి షాన్ ఫ్రేజర్ తాజాగా పేర్కొన్నారు. తమ సంస్థల్లో ఖాళీలను భర్తి చేసుకునేందుకు యాజమాన్యాలు ఎంతో ఆతృతగా ఎదురుచూస్తున్నాయని, ఇందుకు సరళతరమైన వలసల విధానం ఎంతో కీలకమని ఆయన వ్యాఖ్యానించారు.