ఇష్టమైన కారు కోసం ఎంతైనా చెల్లిస్తాం..

భారత వినియోగదారుల అభిమతం

న్యూఢిల్లీ : ఒకపక్క ద్రవ్యోల్బణ భయాలు వెన్నాడుతున్నప్పటికీ భారతీయ వినియోగదారులు తాము కొనబోయే కొత్త కారుకు ప్రీమియం ధర చెల్లించేందుకు సిద్ధంగా ఉన్నారు. 47 శాతం మంది రూ.10-25 లక్షల శ్రేణిలోని కార్లపై మొగ్గు చూపుతున్నారు. ధర కన్నా కొత్త టెక్నాలజీతో అనుభవానికే వారు ప్రాధాన్యం ఇస్తున్నారని డెలాయిటీ అధ్యయనంలో తేలింది. తమకు ఇష్టమైన, మంచి అనుభూతితో కూడిన అనుభవాన్ని అందించే కారు కోసం 4-12 వారాలైనా వేచి ఉండేందుకు ఎక్కువ మంది మొగ్గు చూపారని ఆ నివేదిక తెలిపింది. గ్లోబల్‌ ఆటోమోటివ్‌ కన్స్యూమర్‌ స్టడీ పేరిట డెలాయిటీ గత ఏడాది సెప్టెంబరు 21-29 తేదీల మధ్యన ఈ సర్వే నిర్వహించింది.

సర్వే ముఖ్యాంశాలు..

• రూ.10 లక్షల లోపు ధరలో కారు కొనాలనుకునే వారి సంఖ్య 28 శాతం ఉంది. 57 శాతం మంది రూ.10-25 లక్షల శ్రేణిలోని ఎలక్ట్రిక్‌ కారు కొనాలన్న ఆసక్తిని, 20 శాతం మంది రూ.10 లక్షల లోపు విద్యుత్‌ కారు కొనాలన్న ఆసక్తిని ప్రకటించారు.

• 37 శాతం మంది నిర్వహణ వ్యయాలకు, అనుభవానికి మధ్య సమతూకం సాధించాలనుకుంటున్నారు.

• ఒక బ్రాండ్‌ నుంచి మరో బ్రాండ్‌కు మారే సమయంలో నాణ్యత (62 శాతం), ఫీచర్లు (48 శాతం), బ్రాండ్‌ ఇమేజ్‌ (46 శాతం) పరిశీలిస్తామని చెప్పారు.

• విద్యుత్‌ కార్లు కొనాలనుకోవడానికి తక్కువ ఇంధన వ్యయాలు, మెరుగైన డ్రైవింగ్‌ అనుభవం, తక్కువ మెయింటెనెన్స్‌ వ్యయాలే కారణమని ఎక్కువ మంది చెప్పారు.

• కనెక్టెడ్‌ ఫీచర్లకు ధర చెల్లించేందుకు తాము సిద్ధంగా ఉన్నట్టు 49 శాతం మంది చెప్పారు. నెలవారీ డిజిటల్‌ సబ్‌స్ర్కిప్షన్‌ సేవలు ప్రారంభించడం ద్వారా అదనపు ఆదాయ వనరులు పొందాలనుకునే ఓఈఎంలకు ఇది ఒక సవాలుగా ఉండనుంది.